Shillong, Nailar 02: U myntri rangbah ka jylla u Dr Mukul Sangma mynta ka sngi u la ong ba ka sorkar kan sa shna noh ia ka ain ban iada ia ki paidbah haba ki thep pisa sha ki kompeni ia kaba la tip kum ki “Non Banking Financial Institution”. Ia kane ka bill ynsa wanrah ha ka sien shong dorbar ka ban wan.
Haba kren ha ki nongthoh khubor ha dien ba la wai ka jingialangjong ka cabinet na ka liang jong u myntri rangbah u la ong ba, nalor jong ki bank ba ki don, ki don sha ki kompeni kiba shim pisa na ki paidbah, ban iada ia ki paidbah ka sorkar kan shna noh da ka ain ban ia da ia ki nongthep pisa.
La iathuh ba ka cabinet mynta ka sngi kala rai ban thungkam noh ia ki briew kiba la lada ki la pass ia ki examin jong ki, katba ka jingtohkit jong ki pulit kan dang iaid. Kane ka long ban pynkloi ia ka jingthung kam, la ong ba ka jingslem jong ka jingthung kam ia ki samla kiba la pass ia ki exksam ka dei ba slem ka jingtohkit jong ki pulit. Ha kane ka rukom leh mynta ka long ba ki ba pass ki hap ban pynithih ia lade bad lada lap ba ka don ka jingbakla kin shah weng na ka kam.
Ban ailad ia ki tnad sorkar bapher bapher ban pyndon kam ia ka pisa kaba wan ha ki kam pynroi ka cabinet mynta ka sngi kala shim ia ka rai ban thaw shuh ia ki “Head of Account” ha ki tnad sorkar. Namar ka mang tyngka mynta ka long noh tang kawei kam dei shuh kum mynshuwa ha kaba ka don ka plan bad ka Nan Plan.
Na ka liang jong ka sorkar ka kwah ban burom ia ki trai jaka kiba la ai jaka sha ka sorkar na ka bynta ki kam pynroi, la ka long ki riew shimet, ka kur ka jaid, ki Syiem, ki Doloi ba dki Nokma, ka sorkar ai kam ia ki trai jaka tang ba kane kan long tang ha ka kyrdan Grade III bad Grade IV.
