Shillong, Nailar 30: Ban iada na ka khlam COVID-19 mynta ka sngi ki bor ba dei peit ia ka District Administration jong ka East Khasi Hills District ryngkat ki nongshong shnong ha Police Bazar bad ki trai dukan kila shim ia ka sien jam ban pynkhuid ia katei ka jaka kaba bun ki dukan.
Haba kren ha ki lat pathai khubor ka kong Martina Lynttan kaba dei ka incident commander bad Extra Assistant Commissioner kala ong ba ki briew mynta kila sdang ban sngewthuh ia ka jingdon kam jong ka jingkhuid jingsuba bad ka jingdon kane ka khlam ha kaba kim lah ban shu leh klet khlem da bud ia ki jingbthah kiba ka sorkar kala pynmih la ha ki iing ki sem ne ha ki jaka trei.
“Nga kum ka incident Commander bad ei peit ia kane ka jaka ka dei ka kamram jong nga ban phah ia kane ka khubor sha ki paidbah ban pynsngew sha ki ba ha kane ka jingialeh kim long marwei baroh ki ia trei lang na ka bynta kawei ka thong ban pynkhuid bad ban lait na kane ka khlam COVID” la ong ka kong Martina.
Haba ia dei bad ka jingdon ki dukan hapoh kane ka iew Khyndailad bad GS Road ki don kumba 1300 haduh 1400 tylli, ha kaba sdang ki shem jingeh namar bun na ki dukan kim treh ban kohnguh da kaba pynkhien ia ki jingbthah ka sorkar bad kila shim ia ki lat jingpynshitom da kaba khang ia ki dukan jong kito kiba ia leh pyrshah.
Ha kane ka jingle jong ki bor ba dei peit ia ka District Administration kala wanrah ia ka jingkylla ha ka jingmut jingpyrkhat jong ki briew ha kaba kila deng ia ki mask, kila bud ia ka jingpynia jngai iwei na iwei, kila buh ia ki jingsait kti bad kaba kongsan eh ka long ba bun na ki dukan kila synreit dawai ia ki dukan jong ki bad kyrmen ba kane kan bteng wat ha dien ha bud ruh.
U wei na ki nongshong dukan ha Khyndailad u la ong ba ka ri baroh kawei ka ia leh pyrshah ia kane ka khlam COVID-19, kum ki nongshong shnong jong ka jylla Meghalaya ka dei ka kam jong ki ruh ban pynkhuid ia ka dong kaba ki shnong ki sah ban pynkhuid ia ki sawdong sawkum jong ki, la pynpaw ia ka jingsngewnguh ia ki bor jong ka District kiba la ia kyrshan lang ha kane ka kam pynkhuid ia ka Khyndailad.
