Imphal, Nailur 18: Ban im baroh u khun bynriew sdang ka “Institute of Bioresources and Sustainable Development” (IBSD) 
ia ka jingialap pynneh mariang na ka jylla Manipur . Ia kane ka jingialap ym pynkhriang sha kylleng ka sla pyrthei. Ia kane ka jingialap la pynlait paidbah da ka Lat jong kane ka jylla ka Dr Najma Heptulla.
Ka phang pdeng jong kane ka jingialap pynneh mariang ka long “ Pynneh ia ka mariang ban im u khun bynriew”. Ia kane ka jingialap la shna ha ka dur jong ka phlim kaba lyngkot kaba 60 sekon ia kaba la da ka nongiakura ba pawnam jong ka pyrthei ka Mary Kom.
Kane ka phlim kaba tang 60 sekon,ka long ban pynsngewthuh ia ki briew ba ka mei mariang ka long kaba don kam haduh katta katta na ka bynta ban im u khun bynriew ha kane ka sla pyrthei.
Haba kren ha kane ka jingpynlait paidbah ia kane ka jingialap, ka Lat jong ka jylla Manipur ka Dr Najma Heptulla bad u shongknor ka iing dorbar thawain ka jylla Manipur u Y. Khemchand Singh, kila ai ka jingiaroh ia ka IBSD bad ia ka “National Institute of Department of Biotechnology” jong ka sorkar pdeng kiba la shim ia kane ka sien jam kaba kongsan tam.
U Prof Dinabandhu Sahoo, Director IBSD, u la kdew ba kumno ka mariang ha kane ka thain kala dang hiar kynsan kynsan na ka daw jong ka jingkylla ha ka mariang namar ba ki briew kila pyndon kam bakla ia ka mariang bam kamai spah bad kane kala buh ia ki briew ha kane ka dong shatei lam mih ngi ha ka jingma.
La ong ba na ka daw jong ka jingpynbun ia ki karkhana ka jingshit kala kiew da0.740 C ha kine ki shispah snem bad katkum ka jingkhein jong ki sorkar na ki ri bapher bapher jong ka pyrthei ha u snem 2100 kaq jingshit kan kiew da 1-6-4.30C. Haka juh ka por kim um jong ka duriaw kala kiew da 12-27 cms ha kane ka shispah snem ba la leit noh. Kane kala ktah shimbun ia ka mariang bad kane ka ktah ia ka pyrthei baroh kawei.
Kumba ka long 40% na ka jingioh jingkot ha ka sla pyrthei bad 80% ki briew ki ioh na ka jingdon ki kynbat ki stong ha kane ka sla pyrthei.
Hynrei ka jingma ka long ba haduh 700 jait ki jingthaw b aim ha kane ka sla pyrthei kila sdang ban duh jait mynta bad kane ka dei na ka jingkylla ka suin bneng ha ka mariang. Kine ki jingthaw ba im kum ki kynbat ki stong ki ktah ia ka koit ka khiah jong u briew ha ki bynta kiba bun bad kumba ka long mynta 2.7% ka ioh ka kot jong ka pyrthei ha u snem 2030 kan dei na ki kynbat ki stong.
Ha ka pyrthei baroh kawei ki jaka ba don ia ki kynbat ki stong ki don sa tang 34 tylli ki jaka bad na kine saw tylli ki don ha India bad kita ki long kawei ka ha Western Ghats, ha Eastern Himalayas, ka Indo-Burma bad ka Andaman bad Nicobar Islands, la ong u Sahoo.
