Shillong, Kyllalyngkot 17: Ia ka jingialang ban pynlait paidbah ia ka thup jong ki nongthep vote ha kane ka jylla Meghalaya katkum ka 1.1.2019 la pynlait mynta ka sngi da u Chief Electoral Commissioner (CEO) jong ka jylla Meghalaya ha ka jingialang kaba la long ha DC ophis jong ka East Khasi Hills District.
Haba kren ha kane ka jingialang u Chief Election Commissioner u Bah F R Kharkongor u la ong ba ha kane ka thup bala pynmih ia ki kyrteng jong ki nongthep vote ha kane ka jylla na ka bynta ka MP Ilskehon kaban long mynta u snem 2019 baroh ki don 18,92,716 ngut.
La ong ba ha kane ka jingpynrung kyrteng thymmai la leh ha kata ka rukom ban nym don ba shah ieh sha dien ia kiba dei bad la iathuh ba ha kane ka kynti kaba mynta kiba bun na ki nongthep vote ki dei ki kynthei. Na ka liang jong u CEO u la ong ba bun sien ki paidbah ki kham kiar na ka jingthep but ha ka MP ilekshon, ha kane ka kynti kaba mynta ka ophis kan ia leh ban pynsngewthuh ia ki briew ba kin wan sha khmat ban ia shim bynta ha ka jingiathep but.
La ong ba ia ka kor thep but kaba la tip kum ka “Voter Verification & Information Programme” (VVIP) 1950 yn sap lie paidbah ha ka “National Voters Day” ban ailad ia ki paidbah ba kin lah ban peit la ka but kaba ki thep ka leit hok ne em sha kaba ki thmu.
Ha kane ka sngi u CEO u la pynlait paidbah ia ka ilektotral roll bad sam pat ia ki sha ki seng sain pyrthei bapher bapher ha kane ka jingialang kaba la long ha DC ophis jong ka East Khasi Hills District mynta ka sngi.
