Shillong, Jymmang 04: U Deputy Commissioner jong ka Ri Bhoi District u la pynjari ia ka kyndon 144 CrPC ban khang ia ka buh dewiong ha rud jong ka surok bah NH-6 ia kiba khlem pat thew ha ka jaka thew jong ka sorkar kaba don ha 25 miles ha shnong Shangbangla, Nongpoh.Da kane ka jingpynjari ia ka 144 CrPC la khang pyrshah ia ka jingiadei ia thied dewiong bad ban lum ia u dewiong haruh jong ka surok bah.
Da kane ka hukum la khang ia ki riew shimet ban kin sangeh kali ne shang sharum sahneng ha jan jong katei ka jaka thew dewiong jog ka sorkar bad ban pyrshang ban pyniaid ia ki kali kit dewiong khlem da thew ha ka jaka thew kaba la buh da ka sorkar. Lada lap iano iano yn kem bad pynshitom ia ki katkum ka ain.
Na ka liang jong u DC u la ong ba la hap ban pynjari ia kane ka kyndon namar la shem ba ki don ki briew kiba leh kum ki dalal ha kane ka jaka thew dewiong bad kane ka jingleh ka long beain. Ia kum kine ki briew ruh un kem bad yn pynshitom hapoh jong ka ain namar la ioh jingtip ba kine ki briew ki ialeh ban pynlait ia ki kali kit dewiong khlem da thew ha kane ka jaka thew jong ka sorkar bad kane ka jingbym thew ka wanrah ia ka jingduhnong ia ka sorkar.
Kane ka hukum kan trei kam noh mardor. Ha ka juh ka por la khang ia ki kali kit dewiong ba kin pynieng ia ki kali jong ki ha petrol pump kaba don ha Shangbangla bad la khang ban nym shah ban pyieng palat ia ar tylli ki kali kit dewiong ha ki jaka ba don ki petrol pump lada lap yn pynshitom.
