Shillong, Lber 24: U myntri kam poh iing jong ka sorakr jylla u Bah HDR Lyngdoh, haba jubab ia ka call attention jong u Dr Jemino Mawthoh halor ka jingmih ha kawei na ki kot khubor kaba la ong ba ka Marvellene Inn ka dei ka jaka kaba shngian duh ban die met hapdeng ki hotel ha sor.
U myntri kam poh iing u la ong ba ka tnad pulit kala tip ia kaei kaba la pyni ha kawei na ki TV chanel bad kaba lamih ha kawei na ki kot khubor, halor kane u Director General jong ki pulit u la bethah ia u DIG jong ka Eastern Range ba u dei ban tohkit ia ki trai bad ia ki manager ha kaba ia dei bad kane ka kam.
La bethah ruh ia u Superintendent jong ki pulit ba un khot ia ki trai iing basa bad ia ki manager, la bethah ruh ba baroh ki iing basa ki dei ban buh ia ki CCTV, ki dei ban da pynrung ia ka kyrteng jong kiba wansah ha ki ing basa bad haba ka don kano kano ka jingsuba ki dei ban pyntip sha ki bor pulit bad lada ki ba pyniaid ia ki iing base ki pynkhein ia ki kyndon dei ban khang khyrdep ia ki.
Haba ia dei bad ka Marvellene Inn, la ong ba ki don lai tylli ki mukotduma kiba la register pyrshah ia kane ka iing basa kawei ha Madanriting police station, kawei ha Laitumkhrah police station bad kawei pat ha Laban Police station, ka sorkar kala shim khia ban khanglad ia kine ki kam sniew.
Kum kine ki kam ki long kiei kiei kiba pynpangmet ban tip bad ka sorkar ka dang wad ia ki lad ki lynti kumno ban ia khun pyrshah ia kane ka kam die met bad la dei ban thaw noh da ka ain ruh, kiba bun na kine kiba die met ka dei na ka daw jong ka jingduk kaba la pynlong ia ki ban kin ngop ha kum kine ki jaid kam.
Don kam ban ia leh pyrshah ia kane ka jingsniew, kane ka jingleh ka long beain bad ka dei ruh ka jingeh ha ka imlang sahlang bad na ka liang jong ka sorkar kan ia leh kaba don ki buid ki bor ban khang lad ia kane ka jingsniew.
Haba wanrah ia kane ka call attention, ha ka jingkren lyngkot jong u Dr Jemini Mawthoh, u la ong ba nalor ka Marvellene Inn, ki don ruh ki hotel kum ka Shillong Club Night Inn, Pinewood bad kiwei, u la kdew ruh ia ka kaiphot jong ka Manbha Foundation ha kaba kila don haduh 600 ngut ki briew kiba la leit ban register hapoh kane ka funadation kum kita kiba die met.
