Shillong, Nailur 19: Ka seng HANM kala phah ia ka dorkhas sha u ophisar rangbah ka jylla u bah Donal Phillip Wahlang, ha kane ka dorkhas kila kyrpad ban ia kren lem bad u Director ka Central Board Secondary Education ban kynthup ia ka ktien khasi haka eksamin ka board kum ka subjek kaba ar.
Haba kren ha ki lat pathai khubor u President ka seng HANM u bah Lamphrang Kharbani u la ong ba haba im ka ktien im ka jaidbynriew ban pynkhlain shuh shuh ia ka ktien khasi ka seng ka kwah ban iohi ba ka CBSE ka dei ban kynthup lang ia ka ktien khasi ha ka syllabus ban thoh eksam kum kawei na ki subjek ha ka ktien khasi.
Ka HANM ha ka dorkhas kaba la ai sha u ophisar rangbah ka jylla ka kyrpad ban shim ia ka jingkitkhlieh ba ia kren bad ka sorkar pdeng, kumjuh ia u shongknor ka Central Board of School Education (CBSE) ba dei ban pynrung ia ka ktien khasi ban thoh ia ka eksamin na ka bynta ki khynnah kiba pule ha ki skul ba but ia ki jingpyniaid ka CBSE.
Ka seng kyrpad ia ka burom jong phi ba phin snewbha ban shim khia lem ia kane ba ki skul skul kiba but ia ka rukom pyniaid ka CBSE kin ai lat ia ki khynnah ban thoh ia ka eksamin da ka ktien khasi kumwei na ki subjek, kumba leh ka Indian Certificate Secondary Education (ICSC) bad ka Indian School Certificate (ISC) kiba la pyndon kam ia ktien khasi kum kawei na ki subject ban thoh eksamin.
Ka seng ka kurpad ia ka burom jong phi kum u ophisar ba rangbah ka jylla ban ia kren bad ka tnad pule puthi ka sorkar pdeng, ia u shongknor ka Central Board of School Education (CBSE) ban kynthup noh ia ka ktien Khasi bad Garo kum kawei na ki subjek ban thoh eksam hapoh ka CBSE ia kito ki samla Khasi bad Garo bad kane kan iarap ia ki samla kiba pule ha ki skul ba but ia ki rukom pyniaid ka CBSE.
Ha ka juh ka por ka seng ka kwah ba phin ia kren bad ka sorkar jylla bad ka Meghalaya Board of School Education (MBOSE) ba kito Khasi bad Garo kiba shim ia ka syrnot riewlum ban pynshisha ba ki dei ki Khasi bad Garo ki dei ban toh ia ka eksam ban pynlong ka MBOSE da ka ktien khasi ha kawei na ki subjek kiba don bad ka board ba ki dei ban thoh iaka eksam ha ka tien lang jong kaba dei kawei na ki subjek.
