Shillong, Naitung 12: Ban pynkhlain ia ki seng ia treilang ka ophis jong ka Assistant Registrar of Cooperative Societies, Nongstoin kala pynlong ia ka jingialang paidbah ha Mairang na ka bynta ban pynsngewthuh sha ki paidbah ia ka jingdon kam ban don ia ki kynhun ia treilang ban kyntiew ia ka ioh kot.
Haba kren ha kane ka jingialang na ka liang jong u Bah A Nongbri SDO jong ka Mairang Civil Sub Division u la pynshai ba ka sorkar ka don shibun ki lad ki lynti ba ka sorkar ka la mang na ka bynta ki paidbah hynrei kaba don kam ka long ban ia treilang ban kyntiew ia ka ioh ka kot ryngkat ki tnad sorkar bapher bapher.
Ha kane ka jingiakynduh lang na ka liang jong ka kong S Mawjaw ba dei peit ia ka kam ri dohkha hapoh jong ka Mairang Civil Sub Division kala ong ba duna ki seng ia treilang ban wan sha khmat ban pan jingiarap ban ri dohkha kiba bun dei ki riew shimet. Kala kyntu ba ki seng treilang kin wan sha khmat ban shim ia kane ka kabu.
Ka kong W. Diengdoh, Branch Manager, Meghalaya Cooperative Apex Bank Ltd ha ka jingkren jong ka kala ong ba don kam ban ia treilang na ka bynta ban pynkhlain ia ki seng treilang ban kyntiew ia ka ioh ka kot jong ki paidbah ha ki nongkyndong.
Ha kane ka sngi kila don shibun ki briew jong ka sorkar na ki shnat bapher bapher ban ia pynshai halor ki kam ban kyntiew ia ka ioh ka kot jong ki paidbah da kaba ia treilang, ia ka jingialang la pyniaid da u J.C. Paul, Assistant Registrar of Cooperative Societies, Nongstoin.
