Shillong, Nailar 16: U myntri rangbah ka jylla u Cornad K Sangma ha ka jingkren jong u ha ka sngi rakhe ia ka sngi Laitluid ba 73rd jong ka Ri India ha Madan Polo u la ong ba ka sorkar ka phai khmat sha ka khaii pateng bad ka Bangladesh ban kyntiew ia ka ioh ka kot jong ka jylla.
U myntri rangbah u la ong ba ka long kaba kongsan ban kyntiew ia ka khaii pateng bad ka Ri Bangladesh, u la ong ba ka khappud jong ka jylla Meghalaya bad ka Bangladesh ka long haduh 443 km bad ka jingiakhaii baroh ka long sha Bangladesh. Kumba ka long mynta ka jingiakhaii na Meghalaya sha Bangladesh kala kot sha ka T.600 klur katba ka jylla ka thied jingthied na Bangladesh tang T.30 klur.
U myntri rangbah u la ong ba ka don ka kabu kaba khraw ia ka jylla ban dang pynbha shuh shuh ia ka khaii pateng bad ka Bangladesh, kum juh ha ki kam jngohkai pyrthei ruh kum juh.
Dangshen u High Commissioner jong ka Ri India ha Bangladesh u la wan jngoh ia ka jylla bad kala don ka jingiamir jingmut ba kumno ban dang pynbha shuh ia ka jingdei ha pdeng kine ar tylli ki Ri, u la ia kren ruh bad u myntri rangbah duh jong ka Ri Ban shna ia ka surok ba lah ban iaid kali phra tylli na Guwahati, Shillong Dawki sha Sylhet ban poi sha Chitagong jong ka ri Banfladesh.
