Shillong, Nohprah 02: U Myntri rangbah ka jylla u Conrad K Sangma, haba leit ban plie ia ka jaka jngohkai kaba dang lap shen ha Rongma Gitil ha North Garo Hills, u la pynbna paidbah ba ka jylla Meghalaya kala ioh T.300 klur tyngka na ka bynta ban pynbha ia ki jaka jngohkai pyrthei, na ka bynta katei ka jaka u la pynbna ban ai T.50 lak tyngka ban pynbha iaka.
Ha ka sngi Saitjain, u myntri rangbah ka jylla u la iathuh ruh ha ka jingialang paidbah ha ka jingialang paidbah ban plie ia ka tamasa kaba ar sngi ban khring ia ki nongjgnohkai pyrthei ha Rongma Gitil ba na kane ka pisa T.300 klur tyngka, T. 100 klur la mang tang ia ka Garo Hills.
U myntri rangbah u la ong baroh ki tnad jong ka sorkar, ki bapher bapher ha kine ki khyndait snem ynsa lah ban pynbeit ia ki, u la ai khublei kyrpang ia u MLA jong katei ka jaka u Rupert Momin u ba la trei shitom ba kyntiew ia kane ka jaka kum kawei na ki jaka jngohkai pyrthei.
Ka kam jngohkai pyrthei kan sa kyntiew ia ka jylla bad ha ka juh ka por kan long kawei na ki lad ai kam ai jam ia ki samla ha kine ki sngi ban dang wan, u la ong ba ka jinglong ki lum ki wah ka jylla Meghalaya kam don jingiapher na ka Goa lane ka Sikkim ha kaba kitei ki ar tylli ki jylla kila kiew ha ka ioh ka kot na ka kam jngohkai pyrthei.
Ban kyntiew ia ki kam jngohkai pyrthei, ka jylla ka la ioh T.18,000 klur tyngka ban shna ia ki surok bah bad T.500 klur tyngka na ka bynta ki surok sha ki shnong ki thaw lyngba ka skhim PMGSY. Ban kyntiew ia ki kam jongohkai pyrthei don kam ban shna ia ki surok. Tang na ka bynta jong ka North Garo Hills ka sorkar kan pynling T.253 klur tyngka ha ki kam pynroi baroh.
Ha kane ka tamsa kaba ar sngi, ha Rongma Gitil, ki riew paw khmat kiba la ia don lang nalor u MLA jong kane ka jaka ki long u Marcus Marak Chief Whip, Jim Sangma MLA Rongjeng, Pongseng Marak MLA Bajengdoba, Deputy Commissioner S. C. Sadhu lem bad kiwei kiwei ki heh sorkar jong ka North Garo Hills District.
