Shillong, Rymphang 26: Mynta ka sngi ki nongniah Tourist Taxi ka jylla Meghalaya kila pynsngew ba lada lah ban leh kumba leh ha Delhi Airport ia ka Guwahati Airport kan long kaba bha na ka bynta baroh ki kali kamai kiba leit sha ka tei ka jaka ban lait na ka kti jong ki nongpynwad nongleit nongwan ia kiba la juh khot ki “Dalal”.
U Bah Erwin K Syiem Sutnga president jong ka Meghalaya People Labour Union, u la ong ba ha Delhi ki don ki jaka ba ki nongleit nongwan kin shim da ka tiket bad leit sha kaba ki thmu ha kaba ki npngpyniaid ban pynioh nongleit nongwan kim don, ia kane ka juh ka rukom lada leh hapoh jong ka Guwahati Airport.
Haba ia bad ka jingshah ktah kti jong u wei na ki nongniah tourist taxi na kane ka jylla Meghalaya ha ki nongpynioh nongleit nongwan ha Guwahati airport ha ka sngi Saitjian bala dep na ka liang jong ka seng kala ujor sha ki bor sorkar jylla ka jylla Assam bad kum juh sha ka sorkar Meghalaya.
U Bah Kordor Mawlong president jong ka HTTA u la ong ba ka jingshah khrong palat pud ha ki nongpynioh nongleitnongwan ha Guwahati Airport ka long la palat ka long naduh T.600 tyngka haduh T.1500 tyngka ka shong ha ka jait kali kiba ki pyndon kam, Katba ha Meghalaya kim juh leh ia kane ki siew beit tang ia ka bai lain kaba long T.150 tyngka.
Halor ka jingmih khubor ba ong ba ka don ka jingkhang ia ki kali Assam ban wan sha Meghalaya ka lon ka bym shisha, hynrei ki shu khang tang ba kim dei ban kit nongleit nongwan na ki jaka ieng kali, ia ka jingwan jong ki kim khang bad kumba ka long mynta ka jingshah khang ha kitei ki nongpynioh nongleit nongwan ka dei tang na Assam.
Na ka liang jong ki seng nongniah kali mynta ka sngi kila ia kynduh ia ki briew jong ka sorkar Meghalaya naduh u Commissioner Transport bad kum juh ki pulit jong ka jylla ban ia pynbeit ia kane ka jingeh, na ka liang jong u bah Erwin u la ong ba lada don kam ban leit sha Assam ban ia kren ruh ki long kiba la kloi ban leit.
