Shillong, Risaw 22: Ka jingiakynduh lang jong ki nongialam jong u Bah Lamphrang Kharbani kaba la long ha shnong Rangthong kila ia kren bad ia mir jingmut sani bha ha kaba ia dei bad ka Election MLA ka ban long ha u snem 2018.
Ha kane ka jingiakynduh lang kim shym la lah ban shim ia ka rai, namar la mih shibun ki sur na ki shnong bapher bapher jong ka Ranikor Constituency. Wat ha ka jingjur jong u slap bun bah ki nongialam kila ia poi sha kane ka jingiakynduh lang.
Ka jingbym lah ban shim ia ka rai ha kane ka sngi ka long ba kila don ki nongialam kiba la ai jingmut ban rung noh sha ka seng PDF, don kiba ong ban kyrshan noh ia kano kano ka party kaba don ia ka thong ban jop, kum ka party Congress, UDP, bad ka NPP.
Namar ba u Bah Lamphrang Kharbani u sngap ia ka jingai jingmut jong ki paidbah bad ha ka juh ka por ban twad jingmut ruh na ki nongialam ha katei ka sngi la ai jingmut ban thaw noh da ka Committee ban peit ia kane ka kam.
Ha kane ka sngi la thaw ia ka Committee ban khlieh da u Bah Lamphrang ban long kum u Chairman. Kiwei ki dkhot jong kane ka committee ki long u Bah Holan Kharmawlein, u ban peit ia ka thain Umpung, u Bah Lovingstar Thongny u ban peit ia ka thain Phlangmawprah, u bah D Wanniang u ban peit ia ka thain Mawpud.
Ia u Bah S Khardewsaw u ban peit ia ka thain Rangthong, u Bah Khlur Thyrniang u ban peit ia ka thain Keniong, Bah Defender Paliar u ban peit ia ka thain Rangthong, Bah Centre Kharbani ia ka thain Nongktieh, Bah Jopphrangsngi Dkhar ia ka thain Shnongkalong bad Ranikor, Bah Nongdingroi Shyrman ia ka thian Nongmluh Langrin.
Kane ka jingialang kala shim ia ka rai ban ai por ia kane ka Committee ba kan shim ia ka rai bad pynshong nongreim bad kan hap ban pyndep ia kane ka kamhapoh artaiew bad ia kane ka rai kim sa pynbna ha ka jingialang paidbah hapoh ka iew Mawkyndeng Nongnah bad ia ka tarik ban buh jingialang la aiti ha ka Committee ba kan pynbna. La ong u Bah Lamphrang Kharbani ha ka kyrwoh kaba la phah mynta ka sngi.
