Shillong, Naitung 14: Ka Khasi Student Jaintia Hills District Unit kat nang mih ki sngi ka la nanglah shuh shuh ban pynia
r iaka lyngkha treikam jong ka ha kylleng ki dong ki shnat jong ka Ri Lum Jaintia.
Haka sngi nyngkong, ki nongialam katei ka Seng ki la hiar sa haka shnong Thadlaskeiñ West Jaintia Hills naka bynta ban pynshkem iaka tnad treikam ba thymmai hakatei ka Shnong iakaba la tip kum ka KSU Thadlaskeiñ Unit.
Iakane ka lyngkha treikam ba thymmai la pynsmai bad pynshkem da u Samla SS Niangti , dkhot ka Central Executive Council bad iaka jingialang la pyniaid da u samla Leningrad Tariang Organising Secy ka KSU JHDU.
U Samla SS Niangti haba ai jingkren haka jingialang, ula ong, ” Kum ki nongialam ka KSU hapoh Jaintia Hills , ngi la nang ioh mynsiem bad nang sngewiohbor shuh shuh haba ngi iohi ba katba nangmih ki sngi, katta nangbun ki samla ki samhoi kiba la mih shakhmat ban iasoh sha ka KSU, bad kane hi ka pyni ba mynta ki samla ki la nang don kata ka jingsngewthuh bad ka jingbahkhlieh iala ka Jaitbynriew”
Ula ong ruh ba ka jingshakri hok bad ka jinglen lade ki nongialam ka KSU , ka la pyllong iakiba bun ki briew ban phai khmat sha ka KSU, “Iaka jingtreikam ka KSU la ithuh ym tang hapoh ka Bri u Hynniewtrep, hynrei wat sha kylleng ki Ri ka pyrthei ruh” la ong shuh shuh utei u samla.
“Ngi sngewsarong ruh ban ong ba wat iaki Seng ki samla pule hapoh ka Thain Shatei Lam Mihngi ruh la ialam da u President barim ka KSU hi, U Bah Samuel Jyrwa uba long mynta kum u Chairman ka NESO” .
“Ban long nongialam haka KSU kam long kaba suk, hynrei ngi hap ban mad ia shibun ki jingtynjuh bad ki jingpyntyra ba ha rukom” la bynrap u samla SS Niangti.
Haba ai jingsneng bad kyntu kynpham iaki samla ba dang iasoh thymmai, u Samla SS Niangti ula ong ba kum ki nongialam kiba don iaka jingbahkhlieh ia la ka Ri bad iaka Jaitbynriew la jong ki dei ban tip ruh kumno ban kiar na ki jingmlien kiba sniew kiba lah ban pynhiar iaka jinglong bad ka kyrdan nongialam jong ngi. “Haba ngi pyni iaka jinglong kaba bha sha kiwei, kiwei ruh ki tip ban burom bad ban kohnguh ia ngi” la pynkut u samla SS Niangti.
Hakane ka sngi la ioh ruh iaka jingkren na u Samla Ohibait Dkhar U President ba Rangbah Ka KSU Jaintia Hills hakaba u la ong ba ki dkhot ka KSU kila long lypa ki shipai kiban iakhun ha kino kino ki thma ne ki jingialeh kiba ia tyngkhuh bad ka Jaitbynriew.
“Kaei kaba kongsan tam ka long ba ngi kum ki shipai ka Jaitbynriew ngi dei ban long kiba la pynkhreh janai ban iakhun iaki dawbah ka Jaitbynriew laka long daka bor jabieng ne wat daka bor met ruh” la pynkut utei u samla Rangbah
Kiwei pat kiba ai jingkren hakane ka sngi ki long u samla Venus Syngkon Adhoc President ka KSU Moodymmai Unit, Samla Eugene Hinge General Secy ka KSU Nangbah Unit, Samla Estar Ryngkhlem President Madur Unit, Samla Shaniah Shkem Dkhar Asst Finance Secy KSU JHDU bad u Samla Crispin Dkhar Ex President Jaintia Eastern College Student Union, Khliehriat.
Ki nongkitkam ka KSU Thadlaskein Unit ki long kumne harum: President : Conard Roengent Sana,Vice President: Rulingbyfast Challam, General Secretary : Sendmisa-oo Phawa, Asst General Secretary: Dayoo Pale, Sport Secy: Riburom Jat, Finance Secy: Easterwell Kharsyntiew, Education Secy: Bester Bang, Publicity Secy : Kamni Phawa, Asst Publicity Secy : Rimiki Kharsyntiew, Organising Secretary : Treki Bang bad ki dkhot ki long,Shaniah Ryngkhlem,Demi Dkhar, Brosmi Dkhar, Balanstar Jyrwa, Rimiki Slong,nongai buid Dieu-Avee-nous Pasi.
