Shillong, Naiwieng 11: Ban phla pyrthei ia ka jingngeit Katholik mynta ka sngi ki riewngeit na kylleng ki parish kiba don ha ka jylla naim bah Shillong Archdiocese, Jowai bad Nongstoin Diocese kila ia poi sha ka Prosesion bah kaba juh long shisien shisnem ha Cathedral Parsih, Laitumkhrah ban phla pyrthei ia la ka jinglong khristan ha ka balang Katholik.
Ki paidbah riew ngeit kiba la ia poi na kylleng ki parish kiba don ha kane ka Ri Lum khasi Jaintia kila long da ki lak ngut, kila ia shim bynta da ka jingshit rehem ha ki jingleh niam baroh naduh ka por jong ka Mass bakhuid haduh ka jingiaid prosesion bad la pynkut da ka jingkyrkhu na ka sakrment bakhuid da u lyngdoh sad u Rev Dominic Jala.
Ki riewngeit kila ia shim bynta da ka jingshit rehem ha ka jingiaid paidbah da ki jingduwai bad ki jingrwai ban duwai bad ban iaroh ia u trai Jisu, ha kaba ia ka sacrament ba khuid la rah bad pyniaid lang ha kane ka jingiaid prosesion bah ryngkat ki riew ngeit jong ka balang.
Shuwa ban pynwai ia ka jinglehniam, u Lyngdoh sad u Rev Dominic Jala u la pynbna ba ka balang ka la buh kyrpang ia une u snem kum u snem jong ki samla. Ha kane ka sngi ki lyngdoh sohblei na kylleng ki parish kila iapoi lang ha kane ka prosession bah ha ryngkat ki riew niam na ki kynhun bapher bapher.
U Lyngdoh sad u la kyntu ruh ban duwai lem na ka bynta ki para bangeit kiba la mynsaw ha ka jingkylla ka kali ha Mawrngkneng katba ki dang wan sha kane ka prosession bah ba kin ioh noh ia ka jingkhoit jingkhiah.
