Shillong, Naiwieng 18: Na ka Liang ka CoMSO mynta ka sngi ka la pynlong ia ka jingialang ha NEHU, shillong bad ka la rai ban sdang noh da ki Jingiakhih ban dawa na ka sorkar India ban pyntreikam noh ia ka ILP ha ka Jylla Meghalaya.
Ka CoMSO ka dawa ruh na ka sorkar Meghalaya ba ka dei ban wanrah biang ia Meghalaya Residential Safety and Security Amendment Bill 2020 kaba la pynphai da u lat ka Jylla .
Ka sorkar India ka dei ban burom ia ka resolution ka ing Dorbar thawain ka Jylla bad ia ka jingthrang ki paidbah ka Jylla Meghalaya ban ioh noh ia ka Ain iada Ri ka ILP.
Ka jingpynslem ban pyntreikam Ia ka ILP kam dei na ka daw ba dang pule ia ka hynrei ka dei ka Jing bym don mon. Lada ki Jaidbynriew ha ki wei ki Jylla ki don hok ban iada ia lade lyngba ka ILP balei ki Jaidbynriew trai ri ha Meghalaya kim ioh ia ka juh ka hok.
Ka CoMSO ka dawa ruh na ka sorkar Meghalaya bad ia baroh ki MLA ba Kim dei ban Shu ap sah ia ka jingkuman ka sorkar India hynrei ki dei ban tynruh bad iai dawa tyngeh ia kane. Ngi kwah ban iohi ia ka Jingiakhih ki MLA ban dawa ILP ym tang ha ing dorbar thawain hynrei ha surok ruh kumjuh.
Ka CoMSO Kan pynlong ia ka black flag protest ha ka 27.11.2020 bad kumjuh ruh ia ka sit in protest ha ka 4.12.20 ha baroh ki district headquarters ka Jylla ban dawa ILP na ka sorkar India bad ban dawa biang na ka sorkar Jylla ba Kan wanrah biang ia ka MRSS ( amendment) Bill. Kane ka long katkum ka kyrwoh kaba la phah da u bah Robertjubne Kharjahrin Chairman ka CoMSO.
