Shillong, Nohprah 04: Ban pynbor ia ka sorkar jong u Dr Mukul Sangma ban pyntrei kam noh ia ka Inner Line Permit (ILP) ha ka jylla ka seng Hynniewtrep Youth Council (HYC) kan pynlong ia ka jingiakhih da kaba shah thngan lai sngi lynter kaba kin sdang ha ka 7 tarik bad kin pynkut ha ka 9 tarik mynta u bnai Nohprah.
Haba kren ha ki nongthoh khubor mynta ka sngi ha Shillong Press Club u Bah Robert June Kharjahrin General Secretary jong ka seng u la ong ba ka seng kala dep ban ai ia ka dorkhas sha ka sorkar naduh u bnai Lber 2017 hynrei haduh mynta ka sorkar ka sngap jar jar halor ka jingdawa jong ka seng ia ki 14 tylli ki mat jingdawa ha kaba ia dei bad ka jingkhanglad ia ka jingwan rung ki mynder sha kane ka jylla.
Na ka liang jong ka HYC kala dep ban ia kynduh ia baroh ki seng sain pyrthei ha kaba ia dei bad kane ka jingdawa jong ka seng baroh kila kubur ia kaei kaba ka seng ka dawa lait noh ka seng Congress kaba bat ia ka bor synshar ha ka jylla ia kaba la ialam da ka seng Congress kaba la leh bym salai ia ka jingdawa jong ka seng.
Na ka liang jong ka seng kan pynlong shibun ki jingiakhih nangne sha khmat lada ka sorkar kan nym wanrah ia ka rai sorkar ha kane ka dorbar tlang ban pyntrei kam ia ka ILP ha ka jylla. Lada ka sorkar kam leh ei ei na ka liang jong ka seng kan sdang ia ka jingiakhih jong ka.
Ka seng ka kwah ban iohi ruh ba na kis eng sain pyrthei katno tylli ki ban buh ia ka mat ILP ha ka jingkular election ki jong ki ha kaba ia dei bad ka ILP, lada don ki seng kibym buh ia ka ILP kum kawei na ki mat trei kam ha ka jingkular elelction ka seng kan leit ban kanbas pyrshah ia ki kyrtong jong kata ka party.
Haba ia dei bad ka jingbym lah ka sorkar ban pyntrei kam ia ka ILP ka seng kam kynnoh tang ia u Dr Mukul Sangma Marwein hynrei ka kynnoh ia baroh kis eng sain pyrthei kiba ia don lang ha ka sorkar kynthup ia ki MLA shimet kiba la ai ka jingkyrshan ia kane ka sorkar kaba la ialam da ka seng Congress.
