Shillong,Nailar 22: Ka Khun Hynniewtrep National Awakening Movement (KHNAM) State Youth Wing ka la leit ban bud dien sa na u Chief secretary u Y.tesring mynta ka sngi halor ka jingiaid ban pyntrei kam ia ka jingdawa ban kyntiew karta ia ki kyrtong paid riewlum kiba ia khun ia ka eksam state civil service kumba leh ha kiwei ki jylla.
Haba ai jingkren sha ki lad pathai khubor u Bah Thomas Passah u president ka KHNAM SYW ula ong“ngi la buh ia ka jingdawa na ka sorkar ba ka dei ban pyntrei kam noh ia kane ka hukum da kaba kyntiew ia u trai jylla sha ka 40 snem khnang ba u trai jylla yn lah ban ia khun ia ka eksam.
Ula ong,ka MPSC ka la pynmih ia ka jingpynbna ba ka tarik ba khatduh kan long 31 tarik mynta u bnai kaba baroh ki samla kiba hapoh 32 snem ki lah ban aplai ia ka kam ia kaba ngi la buh ia ka jingdawa ba dei ban kyntiew noh ia ka karta sha ka 40 snem karta ia ki trai jylla.
“Ngin nang iai buddien halor kane ka mat jingdawa bad lada ka sorkar kam lah ban leh eiei ka seng kam banse ban shim da kiwei pat ki lad jingiakhih ban pynbor ia ka sorkar ban pyntrei kam ia kane ka ain”,la ong u Bah Thomas.
U Chief secretary u Y.tesring ula pynpaw ba na ka liang ka jong u , u la dep phah sha ka sorkar.
Ka KHNAM SYW ban pyntikna ia ka jingshim khia ka sorkar ban pyntrei kam ia kane ka ain ka la leit ban ia kynduh ia ka kong RV Suchiang m kaba dei ka state public grievance officer .