Shillong, Nailur 08: U Myntri ka koit ka khiah ka sorkar jylla u bah AL Hek mynta ka sngi u la pyntip ba ka sorkar kala shim ia ka rai ban pynkhlain shuh shuh ia ki jaka ai jingsumar ha ka jylla baroh kawei ha kaba ka sorkar kala pynlait ia ka pisa T.75 klur ha ka bynta kaba nyngkong.
Haba kren ha ki lat pathai khubor mynta ka sngi la iathuh ban aka liang jong u mynta ka sngi u la pynlong ia ka jingiakren bad baroh 11 ngut ki Deputy Commissioner ha ka jylla bad kum juh bad ki District Medical Health officer ban pyniaid ia kane ka kam sha khmat.
Ha kane ka jingiakren kaba la long mynta ka sngi la shim ia ka rai ban thaw ia ka District Committee ha kaba Deputy Commissioner yn long lamphang bad u DMHO kum u secretarty.
Da kane ka jingbei pisa, ka sorkar kan ialeh ban pynkiew kyrdan ia ki PHC sha ki CHC bad kum juh ia ki Dispensary, kane kan long katkum ka jingdon kam ha kaba ka District Committee kan sa ai ia ka jingmunjur bad phah sha ka state Committee ban peit bniah.
Kane ka jingkyntiew kyrdan kan long tang ia kiba la don lypa ym ban shna thymmai ban pynkhlain ia ki jaka surmar jong ka sorkar ha ki jaka kiba la don lypa bad kum juh ia ki nongtrei bad lada don kam ban thied ia ki kor ki bor ruh ka shong ha ka District Commission ban peit kano kaba don kam kyrkieh.
Haba jubab ia ki jingkylli u bah Hek u la ong ba ka sorkar kala ioh shibun ki jingkyrpad na ki myntri sorkar, ki MLA, ki MDC bad kum juh na ki shnong bapher bapher ban pynkiew kyrdan ia ki PHC sha ki CHC.
La iathuh ba kane ka skhim ban pynkhlain ia ki jaka ai jingsumar jong ka sorkar ka don saw bynta bad kane ka jingpynlait pisa T.75 ka dei ka bynta kaba nyngkong bad ka bynta kaba ar, ba lai bad ba saw kan dang wan namar kane ka wan na ka World Bank.
