Shillong, Kyllalyngkot 08: Ka kynhun balai ngut jong ka Election Commision jong ka Ri India kin wan poi sha Shillong ha ka 12 bad 13 tarik mynta u bnai, kata la sngi Balang kane ka taiew. Kane ka jingwan jong ki ka long ban pynkhreh ia ka elekshon sha ka iing dorbar thawain kajylla.
U Chief Electoral Officer jong ka jylla Meghalaya u bah Frederick R Kharkongor u la iathuh ba ki dkhot jong ka ECI kin poi sha Shillong ha 12 tarik bad kin leit phai ha ka 13 tarik mynta u bnai, kane ka jingwan jong ki ka long kum ka jingwan jngoh ia ka jingpynkhreh ia ka elekshon sha iing dorbar thawain ka jylla.
Na kiwei ki lat jingtip la sngewthuh ba ha dien kane ka jingleit phai ka Election Commission sha Delhi la khmih lynti ba ia ka elekshon sha ka iing dorbar thawain ka jylla yn sa pynbna noh ia ka sngi thep vote ha kane ka jylla Meghalaya.
Kumba ka long mynta na ka liang jong ka tnad elekshon jong ka jylla Meghalaya kala pynkhreh na ka bynta ka elekshon, ka jinghikai ia ki ophisar kiba dei ban pyniaid ha ki jaka thep vote kala dang iaid sha khmat.
