Ban pynlait ia ka jingkhap ngiah kali ha Shillong ka sorkar ka hap ban pyndon kam ia ka bor

Shillong, Risaw 23: Ban pynlait ia ka jingkhap ngiah kali hapoh kane ka nongbah Shillong ka sorkar ka hap ban pyndon kam ia ka bor jong ka, da kaba pynheh ia ki surok ha ki katto katne ki bynta kham tam eh na ketting Road ban poi sha them Bijoy namar ka jingkhap ngiah kali kala jyllei palat ha Khyndailad.

Haba u SP News Agency u la ia kren bad bun ki riew piadbah ban twad jingmud na ki halor kane ka jingkhap ngiah kali ha kane ka nongbah Shillong kaba baroh baroh kila ia thnu kat sha ba iaid kam don shuh kawei ruh ka surok ka ban khlem sah kut kali.

Ha ka jingiakren bun kim da kwah eh ban paw ka kyrteng jong ki ha ki, hynrei kila pynsngew ba lada ka sorkar ka lah ban leh ei ei ban shna ia ka surok na Ketting Road ban poi sha Them Bijoy da kaba but ia ka nala kaba don ha kane ka jaka da kaba pan jaka na ka Lady Keane bad na ki trai jaka khap Police Bazar kan iarap shibun ia ka jingkhap ngiah kali.

Kawei pat ka jaka kaba dang lah ban pynheh surok ka long ba lada ka sorkar ka pyndon kam ia ka bor jong ka ban pynheh ia ka surok na Dhanketi sha Madan Iewrynhep da kaba pan ia ka jaka na ka St Edmund College bad kane kan iarap shibun ia ka jingkhapngiah kali bad kawei na Shillong Commerce College sha jan Bajoria School.

Ha ka juh ka por la pynsngew ruh ba lada ki pulit kiba don ha surok ba pyniaid ia ki kali kim dei ban don ka jingsngew la u dei u rit ne u khraw ki dei ban pynshitom na phang kat ia kiba pynkhein ia ki kyndon ain ha surok, lada ki pulit pyniaid kali ki bat ia ka ain katkumb a dei ban leh ka jingdheng kali kan kham duna.

La pynkynmaw ruh ba dan khyndait bnai na ka liang jong u DGP barim jong ka tnad pulit u la khot ia ka jingialang ha ophis jong u ia ki rangbah shnong ki nongpyniaid skul ban ia kren ia kane ka jingdheng kali ha kane ka nongbah shillong hynrei kumba ka paw ba kane ka jingiakren kam shym la trei kam ei ei.

 

What Next?

Recent Articles

Leave a Reply

Submit Comment

*