Shillong, Rymphang 28: Ka Tara Douglas kaba na England kala wan ban pynlong ia ka “Tribal Animation Festival” kaba lai sngi hapoh jong ka North Eastern Hill University da kaba ia trei lang bad ka tnad pule Antropology ia kaba la kyrshan ruh da ka North Eastern Council.
Haba kren ha ki lad pathai khubor ka Tara Douglas ka long ba ha kine ki lai sngi jong ka jingpyniia ki phlim sha phang ki riewlum kane ka thain shatei lam mih ngi jong ka Ri India kaba la shna ia ki lyngba ka “Animation” ka phlim na Meghalaya kaba la ai kyrteng “U Syiem” ruh ka don lang nalor kiwei kiwei kiba dei na kane ka thain shatei lam mih ngi jong ka Ri India bad ki Riewlum na kiwei bynta jong ka Ri India.
Ka jingthmu ban pynlong ia kane ka “Tribal Animation Festival” ka long ban pynneh pynsah ia ki khanatang jong u men barim ha ka dur jong ki phlim. Namar ka khantang ka kynthup naduh ka rum kom ngiet bad ka pyrkhat jong ki riewlum, ym tang ha kane ka dong shatei lam mih ngi hynrei bad ha ka pyrthei baroh kawei.
Ha kine ki lai sngi, ki nongwan ia shim bynta kin long na ka ri Korea, Australia, ki trai shnong na ka Ri America, Canada bad na England. Kala kyntu ia ki paidbah ban wan peit ia kane ka “Tribal Animation Festival” ha kaba yn sa pyni ruh ia ki dur jong ki riewlum kane ka thain kaba la shon da u Dr Kalvin ha u snem 1954 ia kaba la buh bha ia ki da u khun jong u u Ashok Kalvin.
