Shillong, Kyllalyngkot 07: Ka kynhun ki seng bhalang kaba la tip kum ka Confederation of Hynniewtrep Social organization(CHSO) kila pynlong ia ka jingiakhih ha khmat jong ka ophis jong ka BJP ha Bivar Road Shillong ban pyrshah ia ka jingkren jong u myntri rangbah duh jong ka Ri India u Narendra Modi ban pynlong ain noh ia ka Citizenship (Amendment) Bill, 2016.
U President jong ka HYC u Bah Robertjune Kharjahrin haba kren ha ki nongthoh khubor u la ong ba ka jingkren jongu mytnri rangbah duh jong ka Ri dangshen ha ka long kaei kaei kaba sngewsihna ka bynta ki rit paid jong ka dong shatei lam mih ngi jong ka ri India,u la ong ba ka Joint Parliamentary Committee (JPC) kaba la wan ban sngap ia ka jingud jong ki paidbah kane ka thain kam shym la shah skhor kala ai ia ka kaiphot kumba ka long.
Haba phai sha ka sorkar jylla, u la ong ba wat la ka sorkar kala dep ban rai hapoh ka kabinet ban pyrshah ia kane ka Bill, hynrei ka dei ban pynthikna ba ia u myntri jong ka BJP dei ban pynhiar shi, lada ym leh kumta ka long ba ka sorkar ka long arsap, ka CHSO ka daw ba dei ban pynhiar shuki ia u bah AL Hek na ka sorkar uba dei na ka BJP.
La ong ruh “ Ngi da kyntu ia ki dkhot jong ka BJP na kane ka jylla Meghalaya ba ki dei ban ia kren bad ki nongialam ka jong ka BJP ha Delhi halor kane ka Citizenship (Amendment) Bill, 2016, lada ki nongialam na Delhi kim sngap ki dei ban mih noh na ka seng BJP ban phah ia ka khubor kaba shai sha ka sorkar pdeng, lada kim leh kumta yn niew ia ki kum ki nongshet kylla ia ka jaidbyneiww”, la ong u Bah Robertjune.
La kyntu ia baroh kiba dang don ia ka jingsngew ba ki dei ki rit paid jong kane ka dong shatei lam mih ngi jong ka Ri India ba kin pyrshah iakane ka Bill jong ka sorkar pdeng ban pyni ba ki paidbah ka dong shatei lam mih ngi ki pyrshah ia kane ka Citizenship (Amendment) Bill, 2016.
