Shillong, Kyllalyngkot 17: Ka KSU jong ka SWKH District kala pynbna paidbah ba ha ka 24 tarik mynta u bnai kin leit ban tur paidbah sha ophis jong ka Deputy Commissioner jong ka South West Khasi Hills District, ha Mawkyrwat ban dawa ba dei ban weng syndon ia ka jingwad jaka ban buh ktem shipai BSF hapoh jong ka District.
U bah Forwardman Nongrem president jong ka KSU SWKH District haba kren ha ki nongthoh khubor mynta ka sngi u la iathuh ba ka seng kala dep ban ai por ia ka ophis jong u DC jong ka SWKH District ban weng noh ia kane ka jingthmu ban buh ktem shipai BSF hapoh u pud u sam jong ka SWKH District ia kaba kim shym la ioh ia ka jubab haduh mynta ka sngi.
Na ka liang jong ka seng kala rai ba ha ka 24 tarik mynta u bnai kin leit ban tur paidbah sha ophis jong ka DC jong ka SWKH Distrtict ban dawa ba dei ban pynduh pyndam noh ia kane ka jingthmu ban buh ia ka ktem shipai BSF hapoh jong ka tei ka District, la ong u Bah Nongrem.
Na ka liang jong ka KSU ka suba jur ba kane ka jingthmu baroh ka long ban pynbun da ki pyrton shipai ha katei ka thain khnang bam ioh ban khlong ia u marpoh khyndew u uranium u ba don ha kane ka thain. Na ka liang jong ki nongialam jong ka KSU ki buh ka jingkylli kaei ka jingdon kam ban don ia ka ktem shipai BSF hapoh katei ka thain lada kam don jingthmu ei ei sha lyndet.
La ong ba na ka liang jong ka sorkar pdeng bad ka sorkar jylla kala pyrshang bun ki buid ban ialam bakla ia ki paidbah ka tei ka thain bad ban pynbiej kumno ban ioh khlong ia u Uranium u ba don ha Domiasiat. Na ka liang jong ka KSU ka kyntu ia ki trai jaka bad ia ki syiem ba kim dei ban ai jaka da lei lei ban buh ia ka ktem shipai BSF ha katei ka thain ka jong ki.
