Shillong, Jylliew 26: Ki shipai BSF da ka jingsngewkhia mynta ka sngi kila ia mih paidbah ban iaid ha ki surok jong ka nongbah Shillong ban pynpaw ia ka jingpyrshah ka jong ki ha kaba ia dei bad ki kam dih drugs bad khaii briew.
Ha kane ka sngi ki BSF kila kut jingmut ban trei borbah ban khanglad ia kane kam khaii briew bad ki kam dih drugs ha kane ka sngi rakhe ha baroh shityllup ka pyrthei ia ka “International Day against Drug Abuse and Illicit Trafficking”.
Ha kane ka sngi ki BSF kila pynlong ia ka jiniaid kjat kaba 3.5 Km na Primary School, Umpling, lyngba ka Nongmynsong sha Polo, Golf Link ia kane ka jingiaid la khaweh lama da u UK Nayal, Deputy Inspector General bad PRO, BSF jong ka jylla Meghalaya. La kyntu ia baroh ki paidbah ban ia treilang ban ia khun pyrshah ia kane ka jingsniew.
La kyntu ban iarap bad pynsngewthuh ia ki nongdih drugs ba kin kiar na kane ka jingsniew, ym ban kyntiat ia ki ha ka imlang sah lang, ia kum kane ka juh ka jingrakhe la pynlong ha poh jong ka BSF Senior Secondary School, Umpling, la pynlong ruh ia kane ka jingrakhe ha baroh ki BOP jong ki BSF.
