Shillong, Nohprah 04: Ka Khasi Students’ Union (KSU) Central Executive Council lyngba kane ka kyrwoh, ka pyntip sha baroh ki dkhot ka seng ba kum shi bynta ban rakhe ia ka lyngkhuh sngi iap kaba 23 jong u Bah Bull N. Lyngdoh, President ba mynshwa ka KSU, kan pynlong da ki prokram bapher bapher ha ka 7/12/2017 kaba dei ka sngi iap jong une u khlawait ka Jaidbynriew.
Ka seng ka khot ka iawer ia baroh ki dkhot ka KSU ban ia poi ryntih lang ha kajuh ka por ha ka por 10 baje mynstep ha katei ka sngi ha khmat u mot sahnam jong utei u riewkhraw ha Malki.
Ha katei ka jaka ka seng kan pynlong ia ka jingialang ha kaba yn iohsngew ia ki jingkren na ki nongialam ka seng kiba mynta bad kiba mynshwa. Ha katei kajuh ka jaka ka seng kan pynieng ruh ia ki lama ka seng kum ka dak eh rngiew halor ka jingiaid lynti jong ka seng hapoh ki nongialam jong ka naduh ba la seng ia ka tad haduh ka khyllipmat kaba mynta. Ynda la dep kane ka prokram, ka seng kan leit ia shim bynta ruh ha ka Football tournament ba la pyniaid da ka KSU Malki Circle ha ka kyrteng u bah Bull N Lyngdoh ha madan Malki.
Kumta ka seng ka kyntu ia baroh ki dkhot ka seng na kylleng ka Bri U Hynniewtrep ban ia poi khlem pep sha katei ka prokram kum shi bynta ban pyni ka dak burom ia utei u nongialam ka seng uba ia ieng radbah na ka bynta ka dawbah ka Jaidbynriew.
