Mairang, Nohprah 07: U Lat jong ka jylla u Tathagata Roy, mynta ka sngi u la leit jngoh ia ka Khadsawphra College Mairang, hapoh jong ka West Khasi Hills District, ha kaba u la plie ia ka “Open Library” ka “Conference Room” bad ia ka madan jong kane ka College ha ka jingiadon lang u Deputy Commissioner u bah T Lyngwa bad u Superintendent ki pulit u bah GD Kharwanlang.
Ha ka jingkren jong u Lat ka jylla sha ki samla pule jong kane ka Kolej ha kaba la don lang ki kmie ki kpa jong ki samla pule, u la ong ba baroh ki sorkar kiba wan ha ka bor ha Delhi, la ka dei na kano kano ka party ki don ka jingniew burom kyrpang ia ki riti dustur jong ki rit paid kane ka dong shatei lam mih ngi jong ka Ri India.
Kano kano ka party kaba don ha ka sorkar pdeng ka ai jingiada kyrpang ia ki rit paid kane ka thain sha tei lam mih ngi, kumba ka long ka Dongshatei Lam Mihngi jong ka Ri India ki don shibun ki jaidbynriew riewlum, kiba kren hala ki jong ki jong ki ktien. Ka sorkar pdeng ka pynthikna ba man kawei pa kawei ka jaidbynriew kiba kren hala ka jong ka jong ka ktien dei ban pyneh pynsan ia ki ryngkat ia ka riti dustur kaba ki don.
Haba kren halor ka ktien khasi na ka liang jong u Lat ka jylla, u la ong ba ka ktien khasi kala kiew ban ia nujor bad kawei ka ktien jong ki riewlum kaba don ha Tripura, halor ka jingong ban ioh rung ka ktien khasi bad Gaaro ha ka “Eight Schedule” jong ka riti synshar jong ka Ri India kata ka shnong ha ka Government jong ka Ri India bad ka sorkar jylla.
Ha kane ka sngi u Lat jong ka jylla u la iathuh ba u la iathuh ha u myntri ka sorkar pdeng u ba la wan sha Shillong ha kine ki sngi, ba ki briew jong kane ka jylla kila paw bha ha ka tem ka pud bad kum juh ha ka kam ialehkai kynjatbol.
Haba ia dei bad ki jingeh kiba kane ka college ka ia kynduh kumba la pynpaw da ka Vice Principal jong ka College na ka liang jong u Lat ka jylla u la ong ba ka college ka lah ban phah ia ki skhim sha u bad yn sa phah sha ka sorkar jylla ban leh ia kaba donkam, kane kaba u lah ban leh kum u Lat jong ka jylla.
Ha ka jingkren jong u Principal jong ka College u bah Boldness L Nongum, u la batai ia ka jingsdang ia kane ka College ha u snem 2015 ha kaba ki samla pule ki don tang 30 ngut bad mynta kila don haduh 430 ngut, la iathuh ruh ba kane ka College kala ioh ia ka jingithuh na ka skul bah NEHU bad mynta kila ioh ia la ka jong ka jaka thoh eksamin hapoh ka College.
