Shillong, Jylliew 01: Ban tem ia ka jinghuri hura ha ka por miet ki bor jong ka District Adminsrtation kila pynjari ia ka Curfew ban khanglad ia ka jingialum paidbah ha ki bynta jong ka Motphran. Hynrei mynta ka sngi naduh ka por 9 baje ei ei mynstep kala don ka jingialum briew ha Motphram ha kaba ki pulit kila beh iaki sha ki bynta jong ka YMCA.
Haba kine ki riew paidbah kila ialum ha ki bynta jong ka YMCA, na ka liang jong ki pulit kila pynpra ia kine ki paidbah da kaba pyndon kam da kaba siat da ki tear Gas bad beh ia ki sha duh jan iing mane Katholik ha Mawkhar. Ha kane ka jingiabeh ki pulit kila ioh ban rah bun ngut ki briew kaba kila kynnoh ba ki don kti ha ka jingiakawang maw.
Ka jingialeh ha pdeng ki pulit bad ki riew paidbah kala neh naduh katei ka por haduh mynta ka por jan miet ha kaba kala don ka jingiabeh mar kylliang hapdeng ki paidbah bad ki pulit bad ki pulit la pyndonkam bun sien ban siat ia ki tear Gas ban tem ia ki paidbah kiba ia leh ban tur sha ki bynta jong ka Motphran.
Ha kane ka jingialeh ha pdeng ki riew paidbah bad ki pulit kiba dei ki bor jong ka ain mynta ka sngi ha surok Mavis Dunn Road Mawkhar la iathuh ba la don bun kiba mynsaw yn tang na ka liang jong ki paidbah hynrei wat ki pulit ruh kum juh. Kumba ka long mynta kane ka jingiakynad kam pat kut haduh ba thoh ia kane ka khubor.
