Shillong, Jymmang 31: Na ka daw jong ka jingiasoh ia dat ha ka por mynsngi ha Bimola Pioint ha kaba kila don kiba mynsaw bad kane ka jingshah shoh shah dat kala wanrah ia ka jingklumar ha ka por jam miet bad kane kala pur sha Motphran bad na ka liang jong ki paidbah ruh kila bitar ia kane ka jingjia bad kala mih ka jingiakawang maw ha kaba ym lah ban tip mano bas dang.
Ha kane ka jingiather maw katba ki nongthoh khubor kila leit ban peit ia kane ka jingjia, u wei na ki nongthoh khubor u Bah Melquire Laitflang u la mynsaw ha kane ka jingjia bad la rah sha Civil Hospital ban ia ka jingsumar bad ha dien la pynlaitnoh bad kane ka jingiaklumar kala neh ha ki bynta jong ka Motphran. La ong ba kila don ruh kiwei kiwei ki riew paidbah kiba la mynsaw ha kane ka jingia kawang maw.
Na ka liang jong ki pulit ha dien ba kila iohi ia kane ka jingialum ki paidbah na ka liang jong ki pulit kila pyndon kam ban ai “Lathi Charged” hynrei kane kala dang pynbitar ia ki paidbah bad ban pynpra iaki paidbah ki pulit kila pyndon kam da kaba sait ia ki kuli pynsat khmat ia kaba la tip kum ki “Tear Gas”.
Mynta ka miet na ka liang jong ki pulit kila pynkhlain ia ka jingpahra ha saw dong jong ka Iewduh ban khanglad ia ka jingrung ki briew sha ki bynta jong ka Motphran. Na ka liang jong ka tnad pulit kala phah shuh ia ki pulit sha kane ka thain ban kham pynkhlain shuh shuh ia ka jingai pahara.
Hapdeng kane ka jingjia na ka liang jong u MLA jong kane ka jaka u Bah Adelbert Nongrum u la wan hi sha kane ka jaka ban tem ia kane ka jingjia bad mynta kala sdang ban jai jai ha kaba ki nongiew nonghat kila ioh ban mih na ki dukan jong kiba la shah kut naka daw jong ka jingiaklumar.
Haba u SP News Agency u la pyrshang ban kren ia ki bor jong ka District administration ban ioh ia ka jingshai halor kane ka jingjia kaba la mih kynsan kane ka jingklumar mynta ka miet ym shym la lah ban ioh kat haduh ba thoh ia kane ka khubor.
