Shillong, Jymmang 11: Ka iing dorbar thawain ka jylla kala buh ban pynlong ia ka jingai jinghikai ba kyrpang ia ki MLA jong ka iing dorbar thain jong ka Meghalaya Legislative Assembly kiba dang shu jop ha ka sien kaba nyngkong ha kaba ia dei bad ka rukom ban ia shim bynta hapoh ka iing dorbar.
Ka jinghikai kan long ar sngi lynter bad kiba wan ban hikai kin long da ki briew jong ka Parliament. Kane ka jingpynlong ia kane ka jinghikai ka long halor ka jingpan jong ki MLA ba dang shu jop thymmai ha ka sien kaba nyngkong kum ki MLA ha ka dorbar mang tyngka kaba la dep.
Katkum ka jingiathuh jong ki MLA kiba dang shu jop ha ka sien kaba nyngkong la ong ba la buh ban pynlong ia kane ka jinghikai ha ka 10 bad 11 tarik mynta u bnai hynrei na ki daw kiba ym lah ban kiar la rah noh sha ka 24 bad 25 tarik mynta u bnai.
Haba kren ha u SP News Agency bun na ki MLA kiba dang shu jop thymmai kila pynpaw ia ka jingsngew tynnad ba kan don kum kane ka jinghikai ha kaba ia dei bad ka rukom ia shim bynta hapoh ka iing dorbar namar ki don bun ki kyndon bad kane ka jingwan jong ki briew nap oh parliament ban wan hikai kan long ka jingmyntoi kaba khraw.
