Shillong. Lber 19: Ban wanrah ia ka jingiajan hapdeng ka India bad ka Bangladesh, ki shipai jong kine ki ar tylli ki ri kin pynlong ia ka jingniah Saikil lang ka ban sdang ha ka 22 tarik mynta u bnai bad kan kut ha ka 4 tarik jong u bnai Iaiong.
Kane ka jingsdang ia kane ka jingniah Saikil kan sdang na Agartala jong ka Jylla Tripura, ha India bad kan poi sha ki nongbah kiba kham heh jong ka Bangladesh kum ka Comilla, Dhaka, Jessore bad yn pynkut ha Kolkata.
Ki shipai jong ka Ri India bad ka Bangladesh kin pynlong ia kane ka jingniah Saikil kaba man u snem bad kane kan wanrah ia ka jingiajan kaba kham bha hapeng ki kynhun shipai jong kine ki ar tylli ki Ri. Ha kane ka jingianiah Saikil ka kynthup ia 15 sngi ki shipai bad ki ophisar bad kin iaid kumba 500 km bad ki hap ban pyndep ha ki 12 sngi lynter.
Ha kane ka por ba ki pynlong ia kane ka jingniah Saikil, kan don ruh ka jingleit jungoh ia ki jaka ialeh thma kaba la jia ha u snem 1971 bad kane ka thma ka long kaba sah kynmaw namar dei da kane ka thma kaba la wanrah ia ka jinglait luid ia ka Ri Bangladesh.
Na ka liang jong ka Ri India ia ka lama yn khaweh da u Lt Gen A S Bedi, YSM, VSM, GOC Gajraj Corps ha ka 22 tarik mynta u bnai bad kane kan iarap ruh ban sngewthuh ia ki riti ki dustur hapdeng jong kine ki ar tylli ki Ri.
