Ban weng ïa ka jingdheng kali, leit jurip u MLA Mawlai ïa ka Mawlai bye-pass

Shillong, Lber 14: Hadien ba la shah jied kum u Chief Whip ka Liangpyrshah, u MLA ka Mawlai constituency, u Bah Process T Sawkmie hynne ka sngi u la leit jurip ia ka Mawlai Bye-pass, kaba rung na Mawkynroh-Umshing bad mih sha surok bah GS Road lyngba ka Mawiong PHE ha ryngkat ka jingdon lang u Excutive Engineer ka PWD, Umsning Division, uba khmih ia ka surok Mawlai Bye-pass, u Bah Fabian Umdor  bad ki dkhot ka Mawlai Block Congress .

U MLA ka Mawlai u la pynpaw sha u nongthoh khubor ba ka jingthmu bakongsan jong kane ka jingleit jurip jong u ka long ba u la kwah dik dik ba kane ka Mawlai Bye-pass kan dep noh, khnang ba kan lait ka jingdheng kali kaba la bteng ban sahkut haduh kine ki sngi ha Mawlai petrol pump, ter ter sharum bad shaneng ka shilynter ka surok bah Guwahati-Shillong. Kumjuh ruh ban pyllait ia ka jingdheng kali ha Mawlai stand bos, kaba ju jia khah khah.

“Kumba nga la khlei bad nga la angnud naduh shuwa ka elekshon ba leheiei halor ka jingjur palat ka jingdheng kali ha Mawlai petrol pump bad ha Mawlai stand bos, kumta nga wan jurip ia kane ka surok Mawlai bye-pass, khnang bangin ioh ban pyndep noh kloi bad ba kan long ka jingkyrkhu bah ia ki nongleit nongwan, kaban iarap jur ban pyllait ia ka jingdheng kali ha ka thaiñ Mawlai baroh kawei,” ong u Bah PT Sawkmie bad u la bynrap, “Nga kyntu jur ia ki contractor kiba pyntrei ba kin pynsted ia ka kam  jong ki, khnang ban lah ban weng ia ki jingeh baroh, ba ki nongleit nongwan ki mad.”

U la pynpaw ruh ba un sa kren halor kane ka surok kaba la sahteng ha ka dorbar ki nongthawain. Hadien kane u la leit jurip sa ia ka surok Lummawsing, kaba don ha Mawtawar, kaba la donkam ban maramot bad kumjuh ruh ia ka surok Lumsohphoh, kaba hap hapoh ka shnong  Mawsiatkhnam, kaba ka DS Mawsiatkhnam ka la angnud la slem bah ba kan urlong, hynrei kam shym pat urlong haduh kine ki sngi. Kane ka surok kaba rung sha Lumsohphoh ka mih sha Umroi.

Ha ka jingleit jurip ia ka surok ha Mawsiatkhnam la dong ryngkat lang u Rangbah Shnong, Bah J Majaw bad ki nongkitkam shnong, uba la pynpaw ia ka jingkmen halor ka jingsted treikam u MLA thymmai.

“Nga dap da ka jingkmen ba iohi ia ka jingsted treikam u MLA, uba dang shu dep jop thymmai, tang hadien khyndiat sngi ba u la jop, u la da poi iuh kjat ha ka shnong jong ngi ban khmih ia ka surok hapoh shnong kaba ngi la angnud la slem bah bad ngi khmih lynti ba shen ngin sa ioh ia ka surok kaba bha,” ong u rangbah shnong ka Mawsiatkhnam haba kren ha i jingialang ba lyngkot ba la pynlong hynne ka sngi Balang.

Kumba shu kdew ha ka 23 tarik u Rymphang, 2016, u myntri ka tnad PWD, u Bah Sniewbhalang Dhar, uba bat ia ka tnad PWD ha kato ka por u la leit ban jurip ia kane ka surok bad ha kato ka por u Bah Sniawbhalang u la pynpaw sha ki nongthoh khubor  ba la mang T.15 klur na ka skhim 2011-12 ka Special Plan Assistance (SPA) ban shna ia ka surok Mawlai bye-pass kaba jngai kumba 5 kilometer tam.

What Next?

Recent Articles

Leave a Reply

Submit Comment

*