Shillong, Kyllalyngkot 14: ka jinghikai kaba sngi na ka bynta ki heh sorkar jong ka jylla Meghalaya la pynlong mynta ka sngi ha Yojana Bhavan Shillong halor ka phang “Enterprise Architecture” ia kaba la pynlong da ka NIC bad ka jingiatreilang bad ka tnad IT jong ka sorkar jylla.
Ha ka jingkren jong u myntri rangbah ka jylla u Conrad K Sangma haba plie ia kane ka jinghikai kaba shisngi ia ki heh sorkar, u la ong ba ka jingdon ki tehknoloji ha kane ka juk kaba mynta kala iarap ban pynsted ha ka jingtrei kam ban iarap ia ki paidbah sha ki nongkyndong. Da kaba pyndon kam ia ki tehknoloji kala iarap shibun ban budien ha kaba pyntrei kam ia ki skhim la don kam ban dang pynkhlain shuh shuh ha kane ka liang.
U myntri rangbah ka jylla u la ai khublei ia u myntri ka sorkar pdeng u Ravi Shankar Prasad ba dei peit ia ka ministry IT ba u la ai ia kane ka “Enterprise Architecture” sha ka jylla Meghalaya ha dien jong ka jylla Andhra Pradesh bad kaba nyngkong ha North East bad kane kan kyntiew ia ka jylla ha kaba pyntrei kam ia ki kam pynroi da kaba wanrah ha kawei ka jaka ia ki jingtrei kam.
Ka long kaba don kam ban pyniasoh ia baroh ki tnad sorkar ha ka juh ka jaka khnang ba kan suk ha kaba ioh ia ki jingtip na baroh ki tnad sorkar na kawei ka jaka bad kane kan iarap shibun ha ki snem ki ban dang wan. U Bah Hamletson Dohling u la ong ba ha kane ka juk kaba mynta ka IT kan long ka budlum ha kaba pynsted ia ki jingtrei kam na ka bynta u paidbah.
Kiwei kiba la kren ha kane ka jinghikai kaba shi sngi ki long u D.C Misra, DDG u ba dei ruh u khlieh jong kane ka kynhun “Enterprise Architecture Resource Division, NIC New Delhi” u la ong ba ka jingthmu jong kane ka long ban pynsted ha kaba pynioh ia ki jngdon kam jong ki paidbah lyngba kawei ka portal. Kaba don kam ka long ba baroh ki tnad sorkar ki hap ban ai ia ki jingtip kiba bniah ha ka por kaba biang bad ka jingmyntoi kan long na ka bynta ki paidbah, u la ong.
