Shillong, Iaiong 09: U Symbut Myntri Rangbah ka jylla u Bah Prestone Tynsong u la ong ba ka sorkar kala trei shitom ban peit ba ki mar bam ha kane ka jylla kim dei ban duna khamtam u khaw. Ban peit ba kan nym don ka jingduna khaw ha ka jylla ka sorkar kala thied 11,000 metrik tone u khaw na ka Food Corporation jong ka Ri India bad 1000 metrik tone u la poi mynta ha Guwahati ban die sha ki iew kihat.
U Symbut myntri rangbah u la batai shai ba u tei u khaw um don jingiadei ei ei ruh em bad u khaw rashon kaba ki nongbam khaw rashon ki dei ban ioh. U la iathuh ba ia u khaw rashon kaba dei na ka bynta jong u ne u bnai Iaiong la dep ban sei bad shen yn sa sam noh sha ki paidbah kumba ki dei ban ioh. Ia u bnai Jymmang bad Jylliew un dang poi.
Haba ia dei bad kane ka sam ia u khaw rashonu Bah Prestone u la batai shai ba kito ki long iing kiba don ia ka kard ration NFSA kin ioh ei san kilo u khaw u wei pat u wei u briew ba don kyrteng ha ka kard ration. U la batai ba lada don san ngut ki briew kin ioh ei 25 kilo lada don 10 ngut ki briew kin ioh ei 50 kilo u khaw.
La batai ka rukom sam ia u khaw rashon ka long ha ki lai bynta, kiba dei ban ioh ia u khaw ki long kito kiba don ia ka kard NFSA, PHH bad ki Non-NFSA, kiba don ioh ei u khaw shi khlieh briew ki dei tang kito kiba don ia ka kard NFSA bad PHH, katba kito kiba don ia ka kard Non-NFSA kin ioh tang ia kato ka bah kaba ki dei ban ioh 7 kilo kawei ka kard.
Ki briew ha ka jylla baroh kawei kiba don ia ka kard NFSA ki don 70198 tylli ki long iing bad ki briew ki don 290977 ngut, katba kiba don ia ka kard PHH ki don 351305 tylli ki long iing bad ki briew baroh ki don 18,54,0150 ngut. Katba ki Non-NFSA ia u khaw ki lah ban thied na iew.
Haba ia dei bad ki nongrep la ong ba kim dei ban khuslai namar ki don ki kali 1917-ITEAM, lada ki don ki jhur phone sha u number 1917 kin wan ban thied bad kin wan pynpoi ia ki jhur sha ki nongdei ha Shillong bad kane ka long kum juh ia kiwei kiwei ki District ha ka jylla .
Haba iadei bad ki dukan kiba die ia ki jingbam jong ki mrad ruh la pynhap ia ki ha ki bynta ba don kam kumta ki dukan ki lah ban plie ha ki sngi kaba ki DC ki pynbna ban plie ia ki dukan ha ki jaka kaba ki hap.
