Shillong, Kyllalyngkot 04: Ki dkhot ka Seng Hynniewtrep Youths’ Council- Shella Area Unit mynta ka sngi ha ka por 11baje mynstep ki lah lap ia kumba 32 ngut ki bar Jylla kiba lah wan Sha Shella da ka jingthmu ban wan bylla sngi.
Ha ka jingkylli pyrthuh jong ki dkhot ka Seng lah lap ba kine ki briew kim don ia ki Registration Card ba ki dei ban ioh katkum ka Meghalaya Identification, Registration (Safety & Security) of Migrant Workers Act, 2020.
Katkum katei ka Ain baroh ki Nongbylla nabar Jylla ki hap ban aplai ia ki Registration Card Lada ki wan ban bylla sngi ne trei hapoh ka Jylla. Hynrei, kine ki Bar Jylla ki khlem don satia ia kitei ki kot ba donkam.
Kumta, ki dkhot ka Seng ki lah beh krad bad pynphai noh ia kine ki briew da ka kali kaba ki wan bad maham ia ki ba kim dei ban wanrung shapoh ka dong ka thain khlem ki kot ki sla kiba biang.
Ka Seng ka kyntu ruh ia ki bor ba dei peit ba kin shimkhia ban pyrkhing ia ka rung ka mih kiba kum kine ki briew shapoh ka Bri u Hynniewtrep naba ngim tip kiba kumno ki jaidbriew kin wan bad ioh ki pynlong pynban ka jaka riehtngen bad leh ia ki kam sniew ha ki shnong ki thaw bad ki dong ki thain ki jong ngi.
Ka Seng kan iai peitngor bha nangne Shakhmat ruh bad Kan nym ailad ba ki bar Jylla kin wan rung kyrthlep Sha ka dong ka thain ka jong ngi bad ngi kyntu ia baroh kiba wanrah Nongbylla Nongtrei ki dei ban pynbiang shuwa ia ki kot ki sla kiba biang.
