Shillong, Lber 31: Ka Meghalaya Minerals Exporter’s Chamber of Commerce (MMECC) ka pynpaw ia ka jingsngewnguh ia u myntri rangbah ka jylla u Dr Mukul Sangma, u ba la bat ia la ka jong ka kular kaba u la kren hapoh ka iing dorbar thawain jong ka jylla ha ka dorbar mang tyngka kaba dang shu dep ba ka sorkar kan ialeh katba lah ban iarap ia ki briew kiba trei ha kane ka kam mawshun bad kiba in jaka na ka.
Ka MMECC, ka shim ba dei da ka jingshim khia jong u myntri rangbah ka jylla ba ka tnad khlaw mynta kala sdang ban jurip biang ia ka jingdon u Mawshun ba dang sah haki par jong ki briew khnang ban ai jingbit biang ban shallan ia u, ia kane ka leh lyngba u Forest Officer (DFO) territorial Shillong bad la dep ban bethah ia ki ba trei mawshun ba kin buh ia ki application jong ki ban dup lah ban leh ia kaba don kam.
Kane ka lynti kaba ka sorkar kala leh, lyngba jong ka tnad khlaw, na ka liang jong MMECC, ka sngew ba u myntri rangbah ka jylla u la shim ia ka lynti kaba dei ban pynlait ia ki briew kiba im kane ka kam mawshun ba kin ioh bantrei ban ktah bad ha ka juhka por ban dang ioh ban pynkreh iaka mining plan ban ioh ia ka mining lease naka sorkar.
Ka MMECC ka kyntu ia u DFO, territorial East Khasi Hills District ban pynkloi ia kane ka kam ban pyndep kloi ia ka jingjurip khnang ba kito kiba dang don ia u mawshun ba la dep tih yn ioh ban shallan noh ha dien ba ka ophis kala ai ia ka Challan.
Ka jingsngewnguh ka leit ruh sha u nongialam ka liang pyrshah hapoh ka iing dorbar thawain ka jylla u Dr Donkupar Roy, u ba la shim khia ban kren ia kane ka jingeh jong ki paidbah hapoh ka iing dorbar thawain ha kane ka dorbar mang tyngka kadang shu kut shen, ha kaba u myntri rangbah ka jylla ruh u la sngap bad shah skhor bad leh ia kaei kaba u la klur hapoh ka iing dorbar.
