Shillong, Rymphang 07: U Chief Executive Member jong ka KHADC u Bah HS Shylla u la bitar ban iohi ia ka jingiadie jaka pathar hapoh jong ka Hima Jirang ha khappud bad ka jylla Assam ha ki bynta jong ka shnong Rani na ka bynta ban tih maw.
Kane ka jingleit jurip jong u CEM jong ka KHADC sha katei ka thain ka long halor ka jingujor pyrshah ia u Syiem jong ka Hima Jirang u pa’im R H Wahlang na ka kur Wahlang phra kpoh halor kane ka jingleh klumar jong u Syiem ka Hima Jirang ha kaba ia dei bad ka jingiadie ia ki jaka puta.
Ym dei tang kata la kynnoh ba na ka liang jong u Syiem u la thung ruh ia u Deepak Bruah ban long u sordar jong ka kyntoi Rani. Ha kane ka jingleit na ka liang jong u Bah Shylla u la ia kynduh ia ki riew rangbah katei ka thain ha kaba kila ia kren halor ki jingeh kaba ki paidbah ki ia kynduh.
Na ka liang jong u CEM jong ka KHADC u la ong ba ia kane dei ban pynbeit noh ha kaba ia dei bad ki jaka puta hapoh jong ka Hima Jirang. Na ka liang jong u CEM u la iohi da la ki jong ki khmat ia ka jingtih maw pathar ha katei ka thain ha khappud jong ka jylla Meghalaya bad ka jylla Assam.
