Shillong, Kyllalyngkot 03: Ka Deputy Commissioner jong ka East Khasi Hills District mynta ka sngi kala bthahia baroh ki seng sain pyrthei ba kin weng noh ia ki jingthoh jong ki kiba la wah ha kynroh ha kylleng kane ka nongbah Shillong bad ha kiwei ki jaka katkum ki kyndon kiba la buh.
La bthahia baroh ki seng sain pyrthei ba shuwa ba kin buh ia ki lama ne ki jingthoh ba ia dei bad ki ki party ki dei ban da pan jingbit bad ha dien kata ki hap ban weng noh ia ki ha dien bala dep ka jingialang jong ki.
Kane ka jingbthah ka dei kaba la wan na ka elekshon kumba la pynmih na ka por sha ka por bad kane ka long ban pynthikna ba ki dei ban but ryntih, kaei kaba jia ka long ha dien bala kut ki jingialang ia ki lama bad ki jingthoh ba ia dei bad ka party la shuieh khlem weng shuh.
Ka Deputy Commissioner jong ka East Khasi Hills District kala ong ba la iohi ba ia ki lama jong ki seng sain pyrthei la wah ruh wat ha ki iing sorkar, la iohi ruh ba ia ki lama jong ki seng sain pyrthei la wah ha kylleng ki jaka bad la buh ia kine khlem da ioh ia ka jingbit.
Kane ka jingwah ia ki lama jong ki seng sain pyrthei kam dei tang ha kane ka nongbah Shillong hynrei la ioh ruh ha kylleng ki bynta jong ka District, ki seng sain pyrthei ki khlem weng ia ki ha dien bala wai ka jingialang ka jong ki, ka Deputy Commissioner kala pynmih ia kane ka hukum ban seng noh mardor.
