New Delhi, Iaiong 01: Ka Supreme Court of India ka la bthah ia ki lad pathai khubor, ba kynthup ia ki print, electronic bad social media, ban don ia ka jingkitkhlieh kaba jur bad ban pynthikna ban nym pynsaphriang ia ki khubor ba lah ban wanrah ka jingkulmar jingmut.
Ka iingbishar ka la kdew ba ki don bun ki nongbylla kiba na ki jaka bapher bapher kiba trei ha ki nongbah kiba la don hapdeng ka jingkulmar jingmut hadien ba la mih ki khubor hamsaia ba kane ka pakhang shnong kan bteng sa palat lai bnai.
Ka iingbishar ka la rai ba kam lah ban shu khap ki khmat ia ka jingma ba mih na ka jingpynsaphriang ki khubor thok namar ka jingleit jingwan jong ki briew kiba la dap da ka jingtieng namar kine ki jait khubor ka la poi haduh u pud ba ki don kiba la iap ruh namar kane.
Ka iingbishar ka la ong ha ka hukum ba kam don jingthmu ban tuklar bad ki jingiaphylliew jingmut ba laitluid shaphang kane ka jingpang, hynrei ha kajuh ka por ka la bthah ia ki lad pathai khubor ba kidei ban peit bad pyllait ia ki khubor bad ki jingtip ba la ai da ka Sorkar ha kaba iadei bad kine.