New Delhi, Lber 29: Mynta ka sngi ka Sorkar Pdeng ka la bthah ia ki sorkar jylla baroh ba kin pyntreikam sani ia ka jingpakhang shnong ha baroh ki jylla. U Cabinet Secretary jong ka sork
ar pdeng bad ka tnat kam poh iing ka ia kren bara bor bad ki Chief Secretary bad ki DGP.
La pynlong ia ki jingiakren lyngba ka “Video Conference” da u Cabinet Secretary bad u Secretary ka tnad kam poh iing bad ki Chief Secretary bad ki DGP jong ki jylla mynnin ka sngi bad mynta ka sngi ruh kum juh ha ka mynstep porstep.
Ha kane ka jingiakren ka sorkar pdeng kala iohi ba la pyntreikam sani ia ki jingbthah ha man la ki jylla bad ki UT. La ia kren ban pynthikna ruh ia ka jingpynbiang jong ki jing donkam ba kongsan kum ki marbam.
Ha kane ka jingiakren la btah ba dei ban peitngor ia ka jinglong jingman bad la shim ia ki sienjam kat kum ka jing donkam. La la iakren ruh ia ka jingleit jingwan jong ki nong bylla ha ki katto katne ki jaka jong ka ri.
Na ka liang jong u Cabinet Secretary u la bthah ban khang ia ki thain khappud ha man la ki distrik. La hukum ia ki jylla ba kin pynthikna ba yn ym don ka jingiaid jong ki briew ha ki nongbah ne ki surok bah.
Ha ki surok bah dei ban shah tang ka jingiaid jong ki mar ba donkam. Ki DM bad ki SP ki dei ban bah khlieh ia ka jingpyntreikam jong kine ki jingbthah kiba la pynmih hapoh ka DM Act.
La bthah ia ki sorkar jylla ba ki dei ban pynbiang ia ka bam bad ka jaka sah ia kito kiba shem lanot ba ki nong bylla nabar ha ka jaka sah jong ki. Ka Sorkar Pdeng ka la ai hukum hynnin ka sngi ban pyndonkam ia ka fund hapoh ka SDRF na ka bynta kane ka kam. Ki jylla ki biang ia ki fund hapoh kane.
La bthah ruh ia ki jylla ba ki dei ban pynthikna ban pynbiang ka jingsiew bai bylla sha ki nong bylla ha ki jaka trei jong ki ha ka por jong kane ka jing pakhang shnong khlem da don kano kano ka jing ot. Ym dei ban shim ka bai wai iing na ki nongbylla ha kane ka por.
Yn pynshitom ia kito kiba phah mih iing ia ki samla pule ne ki nong bylla.Kito kiba la pynkhein ia ka jingpakhang shnong bad kiba la leit shane shato ha kane ka por kin shah pynsah marwei kumno kumno 14 sngi ha ki jaka pynsah marwei jong ka sorkar.
La ai jingtip halor ka rukom peitngor ia kum kine ki briew sha ki jylla. La ban jur ha ki jylla ba ka jingpyntrei kam ia ka pakhang shnong kaba lai taiew ka long kaba kongsan ban tehlakam ia ka jing pur jong ka jingpang corona virus. Kane ka long na ka bynta ka jingbha jong baroh.
