Nongstoin, jymmang 11: Bun ki nongrep ha ka jylla Meghalaya ki la leh ia ka jingpyrshang kaba bha ha ka jingbud ia ki kyndon jong ka jingpyniajngai iwei na iwei bad ka jingdeng ia ki jingda khmat ha kane ka por jong ka jingeh namar ka jingpang Covid-19.
Ha ka jingleit jngoh ia katto katne ki pynthor kba, kham bun ha ka distrik jong ka West Khasi Hills, lah sakhi ba ka jingpang Covid-19 ka lah wanrah ka jingkylla kaba khraw ha ka jingim ba man ka sngi jong ki nongrep.
Katba ki don katto katne kiba syier mynsiem, kiwei pat kiba long husiar bad don ruh ki bym salia lane ki bym pat don jingtip halor ka jingma jong kane ka jinglong jingman. Kalong ka jingshisha kaba eh ba ki nongrep kim lah ban bud ia ka kyndon ban ‘shong khop ha iing’, khamtam ha kum kane ka por thung por bet haba u slap u pahuh.
“Ka jingda khmat kalong kaei kaei kaba wit ban deng bad baroh na ngi ngim ju mlien ia kane. Hynrei bun na ngi, ngi pyndonkam ia ki jingda khmat haba ngi mih shabar, khamtam hapdeng kano kano ka jingialum briew, na ka bynta ban iada ialade bad ia kiwei,” la ong u Bah Kardinglan Lyngdoh, u nongrep na ka shnong Nondein, Nongstoin ha West Khasi Hills.
Ia kito ki briew kiba trei ia ki kam kiba kham eh kum ka rep ka riang bad ri jingri, kalong kaba eh ban deng ia ka jingda khmat namar ka jingiap op khamtam haba u briew u jur ka jingring mynsiem ha ka por ba trei ia ka kam kaba khia.
“Ngi pynneh ruh ia ka jingpyniajngai iwei na iwei haba ngi trei ia ka kam katkum ki jingbthah jong ka Sorkar. Kane kan iarap ban iada na ka jingpur shuh shuh ka jingpang Covid-19,” la ong u Bah Lyngdoh, uba dang pynkhreh ia la ka pynthor ban thung kba.
Lah iohi ruh ba bun kiwei kiwei ki nongrep jong ka shnong ki pynneh ia ka jingpyniajngai iwei na iwei haba ki don ha ki jaka rep bad kumjuh ruh kiwei kiwei ki kyndon ba iadei bad ka Covid-19.
