Shillong, Nailar 11: U myntri rangbah ka jylla u Dr Mukul Sangma mynta ka sngi u la buh ia u Mawnongrim ba nyngkong ha ka jylla ban tei ia ka ‘Shillong Government College of Engineering’ ia kaba la bei pisa lyngba ka R.U.S.A ha phyllaw jong ka Shillong Polytechnic, Mawlai.
Ha kane ka jingkren jong u Dr Mukul kum u kongsan ha kane ka sngi u la ong ba u dap da ka jingsngew kmen ban ioh ban buh ia une u mawnongrim jong ka Engineering College ia kaba la angnud da ki paidbah ka jylla la bun bun snem. U la ong ba ka sorkar ka ialeh katba lah ban pynurlong ia ka jingangnud jong ki paidbah bad kawei na kita ki jingangnud ka long ban don ia la ka jong ka Engineering College.
La ong ba da ka jingdon ia kane ka jaka pule engineer ha la ka jong ka jylla kan iada na ka jingher ka pisa na kane ka jylla sha kiwei ki jylla jong ka ri India bad ka pule puhthi kan long ka wei na ki nong pynkylla dur bad ka Shillong Government College of Engineering kan long kawei na kita ki jaka pule bad ka jingdon ia kane ka college kan iarap shibun ia ki samla pule kiba la pyndep ia ka Diploma ba kin ioh rung sha ka jingpule engineer.
U Myntri rangbah u la ong ba ki jaka pule engineer kim dei shuh tang ki jaka ban pule ban ioh ia ka jingnang jingtip hynrei ki long kum ki jaka pule ban pynjanai shuh shuh ha ka jingpule, u la ong ba ka jylla kala don ia ka NEHU, NIT, IIM bad ka Shillong mynta kala kylla long ka shlem jong ka jingnang jingstad. U la ong ba kine ki jaka pule kin khring ia ki samla pule kiba na sha bar bakin wan ban pule sha kane ka jylla. U la kyntu ia ki ophisar ba kin trei shitom ban iohi ba kane ka engineering college yn lah ban pyndep ha ka por ba la buh 18 bnai.
Ha kane ka sngi ka Dr Ampareen Lyngdoh Myntri PWD ba dei peit ia ki kam shna ia ki iing ki sem kala ong ba ka dap da ka jingkmen ba la jied ia ka Shillong Polytechnic ba kan long kawei na ki jaka pule line katkum kane ka juk ba mynta katkum ka jinglah ka jong ki khlem da don mano mano ban iarap ia ki na lyndet. Kala long ba kane ka jingkylla na ka Polytechnic sha ka Engineering College ka long ka jingjop kaba khraw bad kane ka dei ban long ka pdeng jong ka jingpule ka ban ia ryngkat dor bar kiwei ki jaka pule ha ka pyrthei.
Ha ka jingkren pdiang jong u Principal, Shillong Government of College of Engineering & Shillong Polytechnic u Bah WL Warjri u la ong ba kane ka jaka pule kan don ia ki shnat pule kum ka Civil Engineering, Electrical Engineering bad Computer Science. Ki samla pule ki lah ban pule ha kane ka college ha ka dor kaba bit. Ia kane ka college la bei pisa da ka Rashtriya Uchchatar Shiksha Abhiyan (RUSA).
Kiwei kiba la ia don lang ha kane ka sngi ki long ka kong Roshan Warjri myntri ba dei peit ia ka pule puthi, ka Debora Ch Marak myntri sorkar jylla u Bah Embhahlang Syiemlieh MLA jong ka Mawlai, u Bah DP Wahlang bad bun ki heh sorkar.
