Shillong, Risaw 11: U myntri rangbah ka jylla u Dr Mukul Sangma mynta ka sngi u la buh ia u mawnongrim ban tei ia ka hos
pital kaba 50 jingthiah hapoh Umniangbyrnai Parila, Umsning ha ka jingiadon lang ka Myntri ka koit ka khiah ka kong Roshan Warjri, u myntri ka kam sam Um u Dr Celestine Lyngdoh ba dei MLA jong kane ka jaka u Parliamentary Secretary, Tourism u Bah Kennedy C Khyriem.
Ha ka jingkren jong u myntri rangbah ha kane ka jingialang paidbah u la ong ba u dap da ka jingkmen ban iohi ba kane ka dong bad ka thain kan ioh ia kane ka jaka ai jingsumar jong ka sorkar kaba 50 jingthiah. Kumba ka long mynta ka jylla Meghalaya ka dei ka jylla kaba dang ialeh ban kiew. Na ka liang jong ka sorkar kala pynmih ia shibun ki skhim ban pynduh ia kane ka jingpher hapdeng kiba don bad ki bym don.
U myntri rangbah u la ong ba ha ki shem kiba la leit bun ki mynsiem briew kila duh ei na ka daw jong ka jingsniew palat jong ka surok, hynrei mynta ka sorkar kala ialeh katba lah ban pynkylla ia kine ki surok kiba sniew sha ki surok kiba bha bad ha ka juh ka por ka sorkar ka ia leh ban pynioh ki lad jingsumar jong ki paidbah kiba kham bha bad kiba kham bit kham biang. Na ka liang jong ka sorkar kala kham phai khmat sha ka rukom ai jingsumar ia ki kynthei bad ki khynnah.
Ka jingmang pisa na ka bynta ban tei ia kane ka hospital kaba 50 jingthiah ka long T.14 klur bad ia ka pisa la dep ban mang haduh T.4.5 klur kane ka jaka ai jingsumar jong ka sorkar ha katei ka jaka kan iar haduh saw akar ka jaka. Ha kane ka sngi u myntri rangbah u la pkie ruh ia ka “Multi Facility Centre” bad ia kane ka jaka la mang pisa haduh T.40 lak tyngka.
Ha kane ka sngi ia ka surok kaba ar kilo metter ban poi sha katei ka jaka ba don kane ka hospital ruh la dep ban shna ha kaba la plie da u myntri rangbah ka jylla mynta ka sngi ha ka, Ha kane ka sngi la pynbna ruh ba la mang pisa ban shna sa 10 km ka surok hapoh jong katei ka shnong.
Kiwei kiba la kren ha kane ka jingialang ki long ka myntri ka koit ka khiah ka kong Roshan Warjri, u MLA jong kane ka jaka u ba dei ruh u myntri hapoh ka sorkar u Dr Celestine Lyngdoh, u Deputy Commissioner jong ka Ri Bhoi bad kiwei kiwei ki heh sorkar.
