Shillong, Kyllalyngkot 03: U myntri rangbah ka jylla u Dr Mukul Sangma mynta ka sngi u la buh ia u Mawnongrim jong ka Tura Medical College ha Doldegre kaba jngai tang kumba phra kilometer na ka sor Tura.
Ka jingeh jong kane ka jaka ka ban shna ia kane ka Medical College ka long 100 akar. Ka jinglut na ka bynta ban tei ia kane ka Medical College kan long haduh T.180 klur tyngka bad ha ka juh ka por ruh ka long ban kyntiew shuh shuh ia ka jingtrei kam jong ka Civil Hsopital kaba don ha Tura.
Ha ka jingshisha ia kane ka Tura Medical College la dep ban buh mawnngrim ha Jewilgre ha jan Damalgre hynrei ym shym la pdiang ia kane ka jaka da ka Empowered Committee katkum ki kyndon kiba la buh da ka Medical Council jong ka Ri india bad kawei na ki kyndon ka long ba ka Medical college kam dei ban jngai palat ia ka 10 KM na ka Hospital.
Ha ka jingkren jong u myntri rangbah ka jylla ha kane ka sngi u la pynpaw ia ka jingsngewkmen ka jong u ban iohi ba ia kane ka jaka pule kaba kongsan tam la lah ban buh ia u mawnongrim mynta ka sngi bad u kyrmen skhem ba kan sa don bun ki jingkylla ha ki snem ban wan ha ka liang ka koit ka khiah.
Ha kane ka sngi u myntri rangbah u la pynpaw ia ki jingeh ha kaba pyntrei kam ia ki skhim jong ka sorkar namar ka jingeh ban ioh jaka. Dei na kane ka daw ba ka sorkar kala wanrah ia ka mat trei kam kaba thymmai ban ai kam ki trai jaka kiba ai khyndew na ka bynta ki skhim jong ka sorkar na ka bynta ka roi ka par jong ka jylla.
Ha kane ka jingialang paidbah na ka liang jong u myntri rangbah ka jylla u la ong ruh ba bun na ki paidbah kila hap ban shun gap noh haba ki pang ki shitom namar ba kim don lad ban leit phah sumar sha bar jong ka jylla na ka daw ba ban ka jingduk, bad kiba ioh ruh ki hap ban pynlut shibun ka pisa ban leit sumar sha bar ka jylla.
Ha kane ka sngi kiba la ia don lang ki long u Zenith M Sangma myntri ka tnad ialehkai, u Noverfield Marak, Dikkanchi D.Shira, Bluebell R. Sangma baroh ki dei ki MLA kiba la ia don lang ha kane ka sngi ryngkat ka jingiadon lang kiba bun ki riew rangbah na katei ka thain.
