Shillong, Naiwieng 10: Mynta ka sngi u Lamphang ka iing dorbar tahwain ka ylla u bah Metbah Lyngdoh ba dei ruh MLA jong ka Mairang u la buh ia u maw nongrim ban shna thymmai ia ka ophis jong ka Block Mairang ha ka jingiadon lang u myntri ba dei peit ia ki kam pynroi nongkyndong u bah Hamletson Dohling.
Ha ka jingkren jong u kum u kongsan, u Lamphang ka Iing dorbar thawain ka jylla, u Bah Metbah Lyngdohu la ong ba ka Mairang Block ka long kawei na ki block kiba la rim tam ha ka jylla bad u la ong ruh ba ka ophis u BDO ka long kawei na ki ophis ba kham don kam jong ka sorkar namar ka long ka nongpyniasoh ia ki paidbah nongshong shnong bad ka synshar khadar lyngba ki tnat bapher bapher jong ka sorkar namar lyngba jong ka la pyntreikam ia kiba bun ki skhim bad prokram jong ka sorkar jylla bad sorkar kmie.
U Lamphang u la pynpaw ruh ia ka jingsngewnguh ia u myntri ka tnat pynroi nongkyndong u bah Hamletson Dohling halor ka jingshimkhia jong u ha kaba iadei bad kane ka skhim shna iing ia kaba la mang pisa T.2.88 klur tyngka bad ia ka ba yn sa sdang pyntrei noh shen.
U myntri ka tnat pynroi nongkyndong u Bah Hamletson Dohling, ha ka jingkren ka jong u, u la kren halor ka jingiaid lynti jong ka tnat lyngba ki snem, khamtam eh ha kaba iadei bad ka jingpyntreikam ia ka skhim MNREGS bad ka jingroi stet jong ka jingdon ki Seng Treilang ne Self Help Group ha ki khyndiat snem kiba la leit noh.
U la pyntip ruh ba baroh 46 tylli ki block jong ka jylla kin sa ioh iala ki ophis treikam kiba thymmai bad la mang pisa mar 2 klur 50 lak na ka bynta ban tei ia ki ophis ba thymmai jong 6 tylli ki blok bad la mang kyllum lang kumba 120 klur na ka bynta ban tei ia ki ophis treikam jong ki 40 tylli kiwei pat ki blok
Kiwei kiwei pat kiba la kren ha kane ka prokram ki kynthup ia u myntri ba dei peit ia ka tnat Water Resources ka jylla, u Bah Brolding Nongsiej, u Deputy Commissioner ka Eastern West Khasi Hills District, u Bah W. Nongsiej, u Additional Deputy Commissioner ka Eastern West Khasi Hills District, u Bah C.P Mawkon bad i BDO ka Mairang C&RD Block, i Dr. L. R Hynniewta.
