Buh Mawnongrim u myntri ka koit ka khiah ia ka AYUSH Hospital ba 50 jingthihah ha Sohra

Shillong, Naiwieng 17:  Ban pynbiang ia ki jingai jingsumar sha ki nongkyndong u myntri ka koit ka khiah jong ka sorkar jylla u bah AL Hek u la buh ia u Mawnongrim ia ka Ayush Hospital, ha Wahshari, Sohra mynta ka sngi.

Ha ka jingkren jong u Bah AL Hek myntri ka koit ka khiah u la ong ba ia kane ka jaka ai jingsumar kaba yn sa shna kala wan lyngba ka tnad jong ka sorkar pdeng ka Ayush hapoh jong ka National AYUSH Mission kaba la mang pisa ban shna ar tylli kum kine ki hospital kane ka Sohra bad kawei ka Ri Bhoi District.

Na ka liang jong u myntri ka sorkar jylla u la batai ba ka jingthmu ban buh ia kane ka jaka ai jingsumar ha Sohra ka long ban kyntiew ia ki kam jngohkai pyrthei ha ka liang jong ka koit ka khiah namar ka sorkar ka don ia ka mariang kaba itynnad kaba lah ban khring ia ki nongwan jngohkai na kylleng ka pyrthei.

U mytnri ka koit ka khiah u la pynsngewthuh ba ha kane ka AYUSH, yn sa shim lang ia ki nongsumar dawai khasi tynrai ban ia trei lang bad ka AYUSH ban pynkhim biang ia ka rukom ai jingsumar u mynbarim ba jah. U la shim nuksa na ka jylla Kerala ba kane ka rukom sumar kala khring ia ki nongwan jngohkai pyrthei. Kane ka kyntiew ruh ia ka ioh ka kot jong ki paidbah.

Ha ka jingkren jong u MLA kane ka jaka u bah Gavin M Mylliem, u la ong ba ka long ka jingsngew sarong na ka bynta ki paidbah ka Sohra, ha ka juh ka por u la kyntu ia ka tnad ka koit ka khiah ba kin sdang noh ia ka jingtrei bad ki dei ban pyndep ha ka por ba la buh. Ynda kane ka jaka ai jingsumar kala dep kan ai shisha ka jingmyntoi ia ki hajar ki nongwan jngohkai pyrthei. La ong ba da ka jingtrei shitom jong u Bah Hek ka CHC Sohra kala ioh iaki kali kit nongpang na ka CSR jong ka Airport Authority jong ka Ri India.

Ha ka jingkren jong u Director ka AYUSH u P Bakshi secretary ka tnad ka koit ka khiah jong ka sorkar jylla u la ong ba kane ka rukom sumar mynta kala kiew bha ha ka ri baroh kawei, u la ong ba kane ka jaka kam dei dei eh ia Hospital hynrei la niew ia ka kum ka “Health and wellness Centre” ha kaba ki briew kin ioh ia ki jingsumar kiba ha rukom.

Kiwei kiba la ia don lang ki long u MLA jong ka Mawsynram u bah HM Shangpliang, MDC jong ka Sohra u Bah Donovan Kharwanlang u Syiem jong ka Hima Sohra u Pa’im Freeman Syiem, u MLA barim ka Sohra  u Bah Titostarwell Chyne bad ryngkat ki briew jong ka tnad ka koit ka khiah jong ka sorkar jylla.

What Next?

Recent Articles

Leave a Reply

Submit Comment

*