Shillong, Nailur 6: Ka JSU seng kmie ka pynpaw iaka jingsngew bynñiaw bad ka pynrem jur iaka jinglong arsap u Myntri Rangbah ka jylla u Conrad K Sangma namar na ka por shaka por u leit ban kynduh ia Amit Shah sha Delhi um juh kren ne dawa na ka sorkar India ban pyntreikam noh iaka ILP hapoh ka jylla.
Ka JSU ka kynnoh ba kane ka pyni shai kdar ba u Conrad um don mon satia ban pyntreikam iaka ILP hapoh ka jylla bad un sùidniew satia ruh iaka sur bad ka jingdawa u paitbah ka Bri u Hynñiewtrep ban pyntreikam iaka ILP hapoh ka jylla.
Ka seng JSU ka lah ong ruh lyngba u samla Treibor R Suchen General Secretary ka seng ba ka jingleh u Conrad ka long ka bym lah ban pdiang namar lah shu pass iaka resolution ka ILP hapoh ing Dorbar Thawaiñ kadei tang ban pynpjah iaka jingiakhih ki sengbhalang bad ki paitbah ka bri u Hynñiewtrep ban dawa iaka ILP ha ki snem kiba lah dep.
Mynta kane ka sorkar hapoh ka jingialam U Myntri Rangbah ka jylla u Conrad K Sangma um don por ban iakren iaka mat ILP bad u Home Minister ka ri India hynrei u lah pynlut por ban leit sha Delhi ban iakren iaka ka kam khalai hapoh ka jylla bad ka ri India hi baroh kawei.
Ka seng kan ym sngap jar iaka ne ka jingleh kuman ka sorkar bad kan sa shong pyrkhat bad kiwei ki paralok sengbhalang bad shen yn sa lum sa lang iaki nongsynshar shnong bad Elaka ha ryngkat u paitbah ban dawa jur ban pyntreikam iaka ILP hapoh ka jylla lah bynrap u President ka seng u samla Jersom Shylla.
