Shillong, Nailur 30: Mynta ka sngi ha ka jingialang paidah kaba la pynlong ha shnong Maweit kaba hap hapoh jong ka West Khasi Hills District, u myntri rangbah ka jylla u Conrad K Sangma u la buh mawnongrim ban shna pynbha 23 km ka surok na jan Nongstoin sha Maweit.Ha kane ka ngi la don lang u MLA jong kane ka jaka u bah Gigur Myrthong, bah Macmillan Byrsat ki ophisar na ka District.
Ban shna pynbha ia kane ka surok 23 km la bei pisa naka Meghalaya Integrated Transport (MITP) bala dei da ka World Bank. Ka jingshan pynbha ia kane ka surok kan sdang na lat Riangdo-Shillong jan ka jignkieng ha Nongdein kaba hap ha Nongstoin bad kan kutha surok Nonghyllam-Maweit, kane ka surok kan iaid lyngba ka shnong, Nongpyndeng,Mawlait,Nongthraw, Wahlyndoh, Nongsbah, Mawdong bad Miangshang.
Ka sorkar kala mang pisa T.98 klur ban shna pynbha ia kane ka surok bad ka jingshna pynbha ia kane ka surok ka long kham heh ia kaba mynshuwa bad ka sorkar kala buh ia ka thong ban pyndep ia kane ka surok hapoh ka 36 bnai naduh ba la sdang trei ia ka.
Ha ka jingkren u myntri rangbah ka jylla u la ong ba ia kane ka surok la leh klet shishsha la bun bun snem, kane ka sorkar mynta kala ialeh ban pynioh ia kaei kaba ki paidbah ki angnud u la ong ba ha u snem 2017 ba u poi kane ka surok kala sniew sha ba palat.
Kane ka sngi ka pynkmen ia u ban ioh ia kane ka lat ba buh ia u mawnongrim ban shna pynbha ia kane ka surok kaba ki paidbah ki la angnud la bun bun snem mynta, la ong ba ka jingdon ia ki surok kiba bha ka long ka jingmyntoi ia ki paidbah,haba biang ki surok ka ioh kot ruh ka kiew.
Ka sorkar ka pynkhlain ha kaba shna ia ki surok bad kiba bun ki surok kiba la mang pisa dei ha West Kahsi Hills District, ki surok kiba la sdang shna bad ki ban sa sdang noh ki don da ki spah tylli bad ka jignmang pisa kala kot hajar klur tyngka tang ha West Khasi Hills baroh kawei, kiba bun ki dei na ka skhim PMGSY.
Ha kane ka jingialang u la pynpaw ba u MLA jong kane ka jaka u bah Gigur Myrthong u bala trei bor bah ban pynioh ia ki skhim shna surok namar kane ka dei ka bynta kaba kongsan ha kane ka thain.
Haba la ioh sngew ia ka jingdawa jong ki paidbah u myntri rangbah ka jylla u la ong ba un sa peit ia ka jingdawa ki paidbah ban kyntiew kyrdan ia ka ia ka PHC kaba don ha Maweit sha ka CHC. Ka sorkar ka sngewthuh ia ka jngdon kam ban pynkhlain ha ki lat ai jingsumar, ia kane ka jingdawa un sa ia kren bad umyntri ba deipeitia ka tnad ka koit ka khiah.
