Shillong, Jylliew 06: Mynta ka sngi la plie ia ka dur jong ki lai ngut ki riew khraw jong ka jylla Meghalaya kiba dei ki nongialeh laitluid jong ka Ri ha Durbar Hall of Raj Bhavan, Shillong, ka dur jong u Pa Togan N. Sangma, U Tirot Sing and U Kiang Nangbah ia kaba la dro ia kine ki dur da ka Riti Academy.
Ia ka dur jong u Pa Togan N. Sangma la plie da u myntri rangbah ka jylla u Conrad K Sangma, ia u dur jong u Tirot Sing la plie da u shnongknor ka iing dorbar thawain ka jylla u Bah Metbah Lyngdoh bad ia ka dur jong u Kiang Nangbah la plii da u myntri ka tnad kam karkhana ka jylla u bah Sniawbhalang Dhar.
Ha ka jingkren jong u Lat ka jylla u Tathagata Roy shuwa ban plie ia kine ki dur jong ki lai ngut ki khla wait ka jylla u la ong ba bun na ki briew ha kiwei ki bynta jong ka Ri India kim don jingtip ei ei halor kine ki nongialeh laitluid jong kane ka jylla.
Na ka liang jong lat u ka iathuh ba ha dien ba u la poi sha kane ka jylla u la don ia kane ka jingthmu ban buh ia ka dur jong kine ki nongialeh laitluid hynrei kala shim por hynrei wat hadpeng kane ka jingshim por la lah ban pyndep ia kane ka kam mynta ka sngi ia kaba la dro da u Bah Raphael Warjri.
Ki briew jong kane ka jylla Meghalaya ki dei ban sngew sarong ia kine ki riew khraw, na ka liang jong u Lat ka jylla u la ong ba u niew ia lade kum u wei na ki nong Meghalaya, kane kam dei namar ba u dei u Lat jong kane ka jylla hynrei namar ba u la heh la san ha kane ka jylla bad u para jong u ba dei u MP ruh kha ha kane ka jylla bad ka kmie bad u kpa jong u ruh dei halor kane ba u sngew ba u dei u nong Meghalaya.
U lat jong ka jylla u ong ba kane ka jingplie ia ka dur jong kine ki lai ngut ki khlawait ka jylla ia kaba ki briew jong kane ka Ri India kim da tip bha, namar kiba bun ki tip tang ia u Tarun Ram Phukon u ba dei na Assam, hynrei ia kiwei ki riew ialeh laitluid kim da tip bha ia khla wait jong kane ka thain.
Na ka liang jong u Lat la kylla u la kyntu ia ka sorkar ba kan shim khia ban pynthikna aiu kine ki riew shlur kila leh ha kaba u wei na ki u la shah sdien phasi bad kane ka dei ka burom ia kaba bun kin tip ha kane ka Ri India, ai ba kane ka long ka jingsdang ba ki briew jong ka Ri India kin tip.
U Lat jong ka jylla ha kane ka sngi u la kdew ruh u la iohi ba ka don ka jingleh na ki katto katne ban pyniapher bad kiwei ki briew jong ka Ri India, kane ka jingleh ka long kaba ymd ei ban leh bad ka long ka bym long bad ia kum kine ki jingleh ym dei ban pynshlur bad kawei ka dei ban leh ka long ban ia burom mar kylliang bad ban pynthikna ki briew na kiwei ki bynta jong ka Ri India kin tip ia ka jingshlur jong kine ki lai ngut ki khla wait ka Ri.
