Shillong, Nohprah 10: Ka District Lum Lyngkien Sohphie jong ka Balang Prebyterian lyngba jong ka Social Eco-Life Development (SELD) Committee kum shibynta ban weng ia ki jingeh ba ki khun samla jong ka thain ki iakynduh bad ha ka juh ka por ban btin lynti ia ki khun samla kiba khlem kam khlem jam kala pynlong ia ka jinghikai iaki samla khlem kam kumno ban shna ia ka sboh ba khlem pyndon kam dawai na ka bynta ka rep jhur rep soh, ia kane la pynlong ha Urlong Tea IVSC Ltd Mawlyngot, Mawkynrew Block.
Ha katei ka jingai jinghikai la wan ban iashim bynta da kiba bun ki khun samla jong ka thain Mawkynrew kynthup ia ki Riew Rangbah bad ki Longkmie jong ka Balang Prebyterian kiba hap hapoh ka jing peit jing khmih jong ka District Lum Lyngkien Sohphie.
Ia katei ka jinghikai la pyniaid da U Rev. B. Lymdem, Pastor ba dei peit ia kane ka thain, ha kaba la ioh ia ka jingkren pdiang sngewbha ia baroh ki Nongia shim bynta da u Bah Seiborlang Mynsong, Secretary SELD bad ia kiba bun ki bynta ha ka rukom ai jinghikai la ai da u tynmenbasan Bah DL Nongspung, President SELD uba dei ruh ha kajuh ka por u Trai jong ka Urlong Tea IVSC Ltd Mawlyngot.
La Pynshngain bad ai mynsiem shuh shuh ia ki khun samla kiba wan shah ai jinghikai ha katei ka Training Programme kaba la pynbit pynbiang da ka Socila Eco-Life Development (SELD) Committee, District Lum Lyngkien Sohphie jong ka Balang Prebyterian da ka jing ia don rynkat jong u Bah Banteidor Lyngdoh, MDC Mawkynrew Constituency uba la long kum u Kongsan ha katei ka sngi.
Haba kren kum u Kongsan ha katei ka sngi na ka liang jong u Bah Banteidor Lyngdoh MDC Mawkynrew Constituency, u la ai jingiaroh shikatdei eh ia kane ka sienjam ba la shim da ka Social Eco-Life Development (SELD) Committee, District Lum Lyngkien Sohphie ban pynlong ia kum kine ki jinghikai da ka mynsiem jong ka jingkitkhlieh bad ka jing iohi jngai ban saindur ia ka lawei jong ki khun samla da kaba bynrap ruh ba kum ka pateng bynriew kaba mynta.
U Bah Banteidor u la ong ba, “ngi im ha ka juk jong kiba bun ki jingkylla bad kadei ka kamram jong ngi mynta ban sumar bad ban tyngkai ia ka spah mariang kaba u Blei u la Kyrkhu kyrpang hapdeng jong ngi”, Shuh shuh U Bah Banteidor u la ong ruh ba kiba bun ki Paidbah Nong Shnong Shnong jong ka Thain kidei kiba im sngi lyngba ka rep ka riang ban bsa ban pjah ia ka ing ka sem, ban ai ka jingnang jingstad iala ki jong ki khun ki kti.
U ne u MDC u la ong ba dei lyngba jong kine ki jinghikai yn lah shisha ban kyntiew ia ka ioh ka kot, ka jing nang jing tip halor ka rep ka riang katkum ka juk mynta bad kumno ban pynjanai ia ka kam. u la ong ruh ba ka por kala dawa kyrkieh ba ka jylla kadei ban don ia ki Policy kiba kyrpang ban prat lynti bad ban saindur ia ka lawei jong ki khun samla la ka long ha ki bynta kiba pher bapher ha kaba iadei bad ki lad iohkam iohjam, daka pymiasoh ia ki tnad sorkar bapher bapher ban kyntiew ia ki kam jngohkai pyrthei.
Kiwei ki lad ki lynti ban seng kam seng jam la ka long lyngba ka kam rep kam riang, ka kam seng karkhana bad kumta ter ter, ha kaba u la ong ruh ba kum u Nongmihkhmat ha I bor iba rit tang kum u MDC watla u don makna shibun ki jing angnud hynrei ka kti kam kot bor satia ban kner lut kat ia ba don hynrei u khmih lynti ba lada u Blei hi u ibit ia u ban long kum uwei na ki Nongmihkhmat sha ing dorbar thaw ain jong ka jylla un sa pyni da ka kam ban pynurlong ia kitei ki jing angnud.
