Shillong, Nohprah 04: U Myntri Rangbah ka jylla u Conrad K Sangma mynta ka sngi u la buh ia u Mawnongrim ban pynbha ia ka surok na kaba leit na Umling sha Patharkhamah ban pynbha ia kane ka surok kaba la sniew palat, ha ka jingiadon lang u synbut myntri rangbah u bah Prestone Tynsong bad u MLA ka Jirang u bah S Sohtun.
Ka jingpynbha ia kane ka surok kan long 31.091 kn na Umrit sha Umdu bad ka jingbei pisa ka wan na ka World Bank bad ia kane ka skhim la tip kum ka Meghalaya Integrated Transport Project (MITP). Kane ka surok ka long kaba kongsan ia ki briew katei ka thain Ri Bhoi.
Ha ka jingkren jong u myntri rangbah ka jylla u la ong ba kane ka surok kan wanrah ia ka jingkylla ha ka ioh ka kot jong ki briew ha kato ka thain. Ka ioh ka kot ka shong eh ha ka jingbiang ki surok bad kane ka sorkar kaba mynta ka long ka peitngor bha ia kane ka bynta.
U myntri rangbah ka jylla u bah Prestone Tynsong u la ong ba ha kine ki ar snem shiteng kane ka sorkar kala dep ban ai jingmynjur haduh T.5000 klur tyngka ban shna ia ki surok ha ka jylla bad ka jingkylla kan sa paw ha kine ki khyndiat por.
Ha kane ka jingialang buh Mawnongrim u myntri rangbah u la ong ba ha kine ki snem kiba la leit noh bun na ki surok kiba don kam ha ka jylla la shah ieh bein haba ki dei ki surok kiba don kam eh jong ki briew kiba don ha kito ki shnong ki thaw jong kito ki jaka.
U Myntri rangbah u la ong ba kum ka surok na Nongstoin sha Maweit, ka long ka surok kaba don kam bha hynrei la shuieh kumta khlem pynbha la palat 40 snem, kum ka surok na Rongram-Dadenggre-Phulbari ka dei ka surok kaba la rim tam ha Garo Hills hynrei kane ka sorkar mynta kala long haduh T.145 klur ban pynbha ia kine ki surok.
Ha ka jingkren jong u Symbut myntri rangbah ka jylla u bah Prestone Tynsong u la ong ba ka sorkar kala ai ia ka jingmynjur ha duh T.300 klur tyngka ban sahna ia ki lai tylli ki surok ha Ri Bhoi District kata ka long ban pynbha ia ka surok kane kaba ki buh Mawnongrim mynta ka sngi Umling sha Patharkhamah ka surok na Umsning-Jagiroad bad ka surok na Nongpoh-Umden-Sonapur.
Ha kane ka sngi kila don lang ruh ki ophisar jong ka PWD, ki heh jong ka District kynthup iaka Deputy Commissioner bad kiwei kiwei ki heh sorkar jong ka jylla ban ia sakhi lang ia kane ka sngi.
